મહીસાગર જીલ્લા પોલીસ અધિક્ષક સફીન હસન અને I/C પોલીસ અધિક્ષક કમલેશ વસાવા દ્વારા નાસતા ફરતા આરોપીઓને ઝડપી પાડવા માટે સૂચના આપવામાં આવી હતી. આ સૂચનાના આધારે, મહીસાગર SOG એ બે અલગ-અલગ ગુનાઓમાં ફરાર આરોપીઓને ઝડપી પાડવામાં સફળતા મેળવી છે. આ આરોપીઓ પ્રોહિબિશન અને અપહરણ જેવા ગંભીર ગુનાઓમાં વોન્ટેડ હતા.
SOG પીઆઈ વી.ડી. ધોરડાના માર્ગદર્શન હેઠળ પીએસઆઈ એચ.બી. સિસોદીયા અને સ્ટાફની ટીમોએ તપાસ હાથ ધરી હતી. આ દરમિયાન, એસ.ઓ.જી. સ્ટાફના એ.એસ.આઈ. કિર્તિપાલસિંહ અને હેડ કોન્સ્ટેબલ અક્ષયભાઈને ગુપ્ત બાતમી મળી હતી. સંતરામપુર પોલીસ સ્ટેશનમાં પ્રોહિબિશન એક્ટ હેઠળ નોંધાયેલા ગુનામાં ફરાર આરોપી દિનેશ ઉર્ફે મકો અર્જનભાઈ પરમાર (રહે. કાળીકામાતા ફળીયું, ઠાસરા, ખેડા) પોતાના ઘરે હોવાની માહિતી મળી હતી.
બાતમીના આધારે, SOG ટીમે તાત્કાલિક કાર્યવાહી કરી દિનેશ પરમારને તેના ઘરેથી ઝડપી પાડ્યો હતો. આરોપીને કાયદેસરની કાર્યવાહી માટે સંતરામપુર પોલીસ સ્ટેશનને સોંપવામાં આવ્યો છે.
બીજી એક કાર્યવાહીમાંSOG પીઆઈ વી.ડી. ધોરડાને ટેકનિકલ અને હ્યુમન સોર્સ દ્વારા બાતમી મળી હતી. વિરપુર પોલીસ સ્ટેશનમાં અપહરણ અને પોક્સો એક્ટ હેઠળ નોંધાયેલા ગુનામાં ફરાર આરોપી રવિ મોહનભાઈ નાયક (રહે. મોટી પાલ્લી નાયક ફળીયું, લુણાવાડા, મહીસાગર) વિરપુર તાલુકાના ભાટપુર ચોકડી ખાતે આવવાનો હતો.
આ બાતમીના આધારે, SOG પીએસઆઈ એચ.બી. સિસોદીયા અને તેમની ટીમે ભાટપુર ચોકડી ખાતે વોચ ગોઠવી હતી. ત્યાંથી આરોપી રવિ મોહનભાઈ નાયકને ઝડપી પાડવામાં આવ્યો હતો. તેને આગળની કાયદેસરની કાર્યવાહી માટે વિરપુર પોલીસ સ્ટેશનને સોંપવામાં આવ્યો છે.