ભારતીય જનતા પાર્ટી (ભાજપ) એ આગામી ખાસ સંસદ સત્ર અંગે તેના તમામ સાંસદોને કડક સૂચનાઓ જારી કરી છે. પાર્ટીએ લોકસભા અને રાજ્યસભાના તમામ સભ્યોને ત્રણ લીટીનો વ્હીપ જારી કર્યો છે, જેમાં તેમને ૧૬ થી ૧૮ એપ્રિલ સુધી ગૃહમાં ફરજિયાત હાજરી સુનિશ્ચિત કરવા જણાવ્યું છે.
પાર્ટીએ સ્પષ્ટ સૂચના આપી છે કે આ સમયગાળા દરમિયાન કોઈપણ સાંસદ કે કેન્દ્રીય મંત્રીને રજા આપવામાં આવશે નહીં. બધા સભ્યોને ગૃહમાં સતત હાજરી અને સંસદની કાર્યવાહીમાં સક્રિય ભાગીદારી સુનિશ્ચિત કરવા કહેવામાં આવ્યું છે. સૂત્રોના જણાવ્યા અનુસાર, મહિલા અનામત સુધારા બિલ પર ચર્ચા કરવા માટે આ ખાસ સંસદ સત્ર બોલાવવામાં આવ્યું છે. સરકાર આ ઐતિહાસિક બિલ પર વ્યાપક ચર્ચા અને આગળની પ્રક્રિયા ઝડપી બનાવવાનો હેતુ ધરાવે છે.
ભાજપે જારી કરેલા પત્રમાં જણાવાયું છે કે, “ગુરુવારથી શનિવાર, ૧૬ એપ્રિલથી ૧૮ એપ્રિલ, ૨૦૨૬ સુધી લોકસભા અને રાજ્યસભાના તમામ ભાજપ સભ્યોને ત્રણ લીટીનો વિહપ જારી કરવામાં આવી રહ્યો છે. ઉપરોક્ત ત્રણેય દિવસો દરમિયાન તમામ કેન્દ્રીય મંત્રીઓ અને સભ્યોને ગૃહમાં હાજર રહેવા વિનંતી કરવામાં આવે છે. ગૃહમાં હાજરી ફરજિયાત છે. કોઈ રજા આપવામાં આવશે નહીં. સભ્યોને વિનંતી કરવામાં આવે છે કે તેઓવિહપનું કડક પાલન કરે અને ગૃહમાં તેમની અવિરત હાજરી સુનિશ્ચિત કરે. તમારા સહયોગની ખૂબ પ્રશંસા કરવામાં આવે છે.”
આ દરમિયાન, આ ખાસ સત્રને લઈને રાજકીય વાતાવરણ પણ ગરમાયું છે. વિરોધ પક્ષોએ સરકાર પાસે પહેલા સર્વપક્ષીય બેઠક બોલાવવા અને સીમાંકન જેવા મુદ્દાઓ પર સ્પષ્ટ માહિતી પૂરી પાડવાની માંગ કરી છે. કોંગ્રેસ અધ્યક્ષ અને રાજ્યસભામાં વિપક્ષના નેતા મલિકાકાર્જુન ખડગેએ વડા પ્રધાન નરેન્દ્ર મોદીને પત્ર લખીને મહિલા અનામત બિલ અને સીમાંકન મુદ્દા સંબંધિત પ્રસ્તાવિત બંધારણીય સુધારાઓ પર ચર્ચા કરવા માટે સર્વપક્ષીય બેઠક બોલાવવા વિનંતી કરી હતી. તેમણે આરોપ લગાવ્યો કે વિપક્ષને વિશ્વાસમાં લીધા વિના ખાસ સંસદીય સત્ર બોલાવવામાં આવ્યું હતું, અને ચેતવણી આપી હતી કે અર્થપૂર્ણ ચર્ચા માટે મહત્વપૂર્ણ વિગતો હજુ પણ અસ્પષ્ટ છે.