સ્ટેટ મોનીટરીંગ સેલ (એસએમસી)ની ટીમે અમદાવાદના નરોડા વિસ્તારમાં દહેગામ રોડ પર આવેલા હંસપુરા ઓવરબ્રિજ પાસેથી વિદેશી દારૂની મોટી હેરાફેરી ઝડપી પાડી છે.એસએમસીની આ સરપ્રાઈઝ કામગીરીના કારણે સ્થાનિક પોલીસની કામગીરી સામે પણ મોટા સવાલો ઊભા થયા છે.બાતમીના આધારે પોલીસે કાળા કલરની સ્કોર્પિયો કારને રોકીને તપાસ કરતા અંદરથી ભારતીય બનાવટનો વિદેશી દારૂ મળી આવ્યો હતો. પોલીસે કુલ ૫૦૩૦ બોટલ દારૂ જપ્ત કર્યો છે, જેની અંદાજિત કિંમત રૂપિયા ૧૫,૫૮,૮૦૦ થાય છે.
પોલીસ અને વહીવટી તંત્રને થાપ આપવા માટે આ સ્કોર્પિયો કાર પર ખોટી નંબર પ્લેટ લગાવવામાં આવી હતી, જ્યારે અંદરથી વાહનની સાચી નંબર પ્લેટ પણ મળી આવી હતી. દારૂ, કાર અને અન્ય મુદ્દામાલ મળીને કુલ રૂપિયા ૩૦,૫૮,૮૦૦નો જથ્થો કબજે કરી નરોડા પોલીસ સ્ટેશનમાં ગુનો નોંધવામાં આવ્યો છે.
પોલીસે ડ્રાઇવિંગ સીટ પર બેઠેલા રાજસ્થાનના ખેરવાડા તાલુકાના રહેવાસી જિતેન્દ્ર ઉર્ફે જીતુ નાથાલાલ ડામોરની ધરપકડ કરી છે. પૂછપરછ દરમિયાન આરોપીએ જણાવ્યું કે તેને એક ટ્રીપના ૫૦૦૦ રૂપિયા મળવાના હતા. રાજસ્થાનના અનેલા ગામથી દારૂ ભરીને તેઓ અમદાવાદ આવતા હતા. દહેગામ નર્મદા કેનાલ પાસે એક્ટવા પર આવેલા શખ્સો પૈકી એક વ્યÂક્ત રસ્તો બતાવવા કારમાં બેઠો હતો અને બાકીના પાઇલોટિંગ કરી રહ્યા હતા. પોલીસને જાઈને કારમાં સવાર અન્ય શખ્સો ફરાર થઈ ગયા હતા.આ ગુનામાં મોટા નેટવર્કનો પર્દાફાશ થયો છે. પોલીસે પ્રવિણ નારાયણભાઇ ડામોર, દારૂ ભરાવી આપનાર અનિલ દાદુ ભરડા, જથ્થો સોંપનાર લોકેશ પટેલ, કારના માલિક અબ્દુલ વહાબ ખાન, પાઇલોટિંગ કરનાર એÂક્ટવા સવાર તેમજ અમદાવાદમાં દારૂ મંગાવનાર મુખ્ય સૂત્રધાર સહિતના શખ્સોને વોન્ટેડ જાહેર કર્યા છે. અમદાવાદમાં આ જથ્થો કોણે મંગાવ્યો હતો અને અગાઉ કેટલી ફેરી થઈ છે તે અંગે તપાસ ચાલુ છે.