ગુજરાતમાં ગરમીનો પ્રકોપ યથાવત રહેવાની શક્યતા છે. હવામાન વિભાગના અનુમાન મુજબ, આગામી સાત દિવસ દરમિયાન રાજ્યભરમાં હવામાન સૂકું રહેશે. મધ્ય અને દક્ષિણ ગુજરાતની સાથે સૌરાષ્ટ્ર અને કચ્છમાં પણ સૂકા વાતાવરણની સ્થતિ જળવાઈ રહેવાની શક્યતા છે. આ સમયગાળા દરમિયાન મહત્તમ તાપમાનમાં કોઈ મોટો ફેરફાર થવાની સંભાવના નથી. પવનની દિશા ઉત્તર-પશ્ચિમથી ઉત્તર તરફની રહેવાનું અનુમાન છે.
છેલ્લા ૨૪ કલાકના તાપમાનના આંકડા મુજબ, બનાસકાંઠાના ડીસામાં રાજ્યનું સૌથી વધુ મહત્તમ તાપમાન ૩૯.૮ ડિગ્રી સેલ્સિયસ નોંધાયું હતું. બીજી તરફ, દ્વારકામાં સૌથી ઓછું મહત્તમ તાપમાન ૩૧.૨ ડિગ્રી સેલ્સિયસ નોંધાયું હતું. આ આંકડા રાજ્યના વિવિધ વિસ્તારોમાં તાપમાનનો તફાવત દર્શાવે છે. અમદાવાદમાં મહત્તમ તાપમાન ૩૮.૫ ડિગ્રી સેલ્સિયસ નોંધાયું હતું,
જ્યારે રાજકોટ અને સુરેન્દ્રનગરમાં તાપમાન ૩૯ ડિગ્રી સેલ્સિયસ રહ્યું હતું. આ સાથે રાજ્યનાં અનેક શહેરોમાં ગરમીનો અનુભવ થઈ રહ્યો છે.હવામાન વિભાગના અનુમાન મુજબ, અમદાવાદમાં આજે મહત્તમ તાપમાન આશરે ૩૭ ડિગ્રી સેલ્સિયસ રહેવાની શક્યતા છે. આગામી દિવસોમાં તાપમાનમાં નોંધપાત્ર ઘટાડાની શક્યતા ન હોવાથી લોકોને ગરમીથી બચવા જરૂરી સાવચેતી રાખવાની સલાહ આપવામાં આવે છે.