નસવાડીના નવગામ પ્રા. શાળાની અધૂરી કામગીરીથી વિદ્યાર્થીઓ કપચીના ઢગલામાં ભણવા મજબૂર

રાજ્ય સરકાર એક તરફ શાળાઓને સ્કૂલ ઓફ એક્સેલન્સ (SoE) બનાવીને આધુનિક શિક્ષણના દાવા કરી રહી છે. ત્યારે બીજી તરફ નવગામની સરકારી શાળાની વાસ્તવિકતા કંઈક અલગ જ ચિત્ર રજૂ કરી રહી છે. ઉનાળુ વેકેશન પૂર્ણ થયા બાદ શાળાઓ તો શરૂ થઈ ગઈ, પણ અહીંના ભૂલકાઓ માટે નવું શૈક્ષણિક સત્ર ખુશીઓને બદલે મુસીબતો લઈને આવ્યું છે. મેદાનમાં રમતને બદલે બાળકોના માથે જોખમ છે.

શાળાની કામગીરી કોન્ટ્રાક્ટર અધૂરી મૂકી ગાયબ થઈ ગયા બાદ હજુ કોઈ પતો નથી. નવગામની શાળામાં જે મેદાનમાં બાળકોએ દોડધામ કરવાની હોય, ત્યાં આજે બાંધકામની કપચી અને રેતીના ઢગલા ખડકાયેલા છે. નવાઈની વાત એ છે કે વેકેશનના લાંબા સમયગાળા દરમિયાન આ કામ પૂર્ણ કરવાને બદલે, કોન્ટ્રાક્ટર કામ અધૂરૂં છોડીને રફુચક્કર થઈ ગયા છે. શાળાના પ્રાંગણમાં વેરવિખેર પડેલી સામગ્રીને કારણે બાળકો માટે અકસ્માતનો ભય સતત તોળાઈ રહ્યો છે.

શિક્ષકો અને વાલીઓમાં ભારે રોષ શાળાના શૈક્ષણિક કાર્યમાં આ બાંધકામને લીધે ભારે વિક્ષેપ પડી રહ્યો છે. શાળાના શિક્ષકોએ આક્રોશ વ્યક્ત કરતા જણાવ્યું કે જીલ્લાના અધિકારીઓ ધ્યાન આપી નવગામ ગામે શાળા જે કામગીરી શરૂ કરાઈ હતી તે જલ્દી પૂર્ણ કરાવે અને કામગીરી અધૂરી છોડનાર કોન્ટ્રાકટર કામગીરી કરવા ન આવાનો હોય તો મટેરીયલ વચ્ચેથી હટાવે તેવી માંગ ઉઠી છે.