૨૮ થી ૩૦ સપ્ટેમ્બર સુધી દેશવ્યાપી બેંક હડતાળને ધ્યાનમાં રાખીને, નાણા મંત્રાલયે સામાન્ય લોકોની સુવિધા માટે એક મોટો નિર્ણય લીધો છે. બુધવારે જારી કરાયેલ એક અખબારી યાદીમાં, નાણા મંત્રાલયે જણાવ્યું હતું કે તમામ સરકારી બેંકો અને પ્રાદેશિક ગ્રામીણ બેંકો રવિવાર, ૨૭ સપ્ટેમ્બરના રોજ ખુલ્લી રહેશે. નાણા મંત્રાલયના જણાવ્યા અનુસાર, આ રવિવારે તમામ જાહેર ક્ષેત્રની બેંકો અને પ્રાદેશિક ગ્રામીણ બેંકો રાબેતા મુજબ કાર્યરત રહેશે.
નોંધનીય છે કે બેંક કર્મચારીઓના સંઘ, યુનાઇટેડ ફોરમ ઓફ બેંક યુનિયન્સએ ૨૮ થી ૩૦ સપ્ટેમ્બર, ૨૦૨૬ સુધી ત્રણ દિવસની દેશવ્યાપી બેંક હડતાળનું એલાન કર્યું છે. આ હડતાળ ૨૬ અને ૨૭ સપ્ટેમ્બરના શનિવાર અને રવિવારની રજાઓ પછી તરત જ થઈ રહી છે. આનો અર્થ એ થયો કે બેંક કામગીરી સતત પાંચ દિવસ સુધી પ્રભાવિત થવાની હતી, જેની સીધી અને પ્રતિકૂળ અસર સામાન્ય ગ્રાહકો પર પડવાની હતી. પરિણામે, સરકારે સામાન્ય ગ્રાહકોની બેંકિંગ જરૂરિયાતોને પહોંચી વળવા માટે પહેલાથી જ જરૂરી પગલાં લીધાં છે.
સામાન્ય જનતાની બેંકિંગ જરૂરિયાતો લાંબા સમય સુધી પ્રભાવિત ન થાય તે માટે, તમામ જાહેર ક્ષેત્રની બેંકો અને પ્રાદેશિક ગ્રામીણ બેંકો રવિવાર, ૨૭ સપ્ટેમ્બરના રોજ રાબેતા મુજબ કાર્યરત રહેશે. ભારતીય રિઝર્વ બેંકે ૨૭ સપ્ટેમ્બરના રોજ તમામ બેંક શાખાઓ, કચેરીઓ, એટીએમ -સંલગ્ન શાખાઓ અને કરન્સી ચેસ્ટના સંપૂર્ણ સંચાલનને પણ મંજૂરી આપી છે.
નાણા મંત્રાલયે તેની પ્રેસ રિલીઝમાં જણાવ્યું હતું કે, “વિભાગ પુનરોચ્ચાર કરે છે કે બેંક ગ્રાહકોનું કલ્યાણ અને સુવિધા સરકારની ટોચની પ્રાથમિકતા છે. સરકાર અને બેંક મેનેજમેન્ટે યુનિયનોને પ્રસ્તાવિત હડતાળ મુલતવી રાખવા અપીલ કરી છે અને આવશ્યક બેંકિંગ સેવાઓ કોઈપણ વિક્ષેપ વિના ચાલુ રહે તે સુનિશ્ચિત કરવા પગલાં લીધા છે.”
બેંક યુનિયનો દ્વારા બોલાવવામાં આવેલી ત્રણ દિવસની હડતાળને ધ્યાનમાં રાખીને, સ્ટેટ બેંક ઓફ ઇન્ડિયા અને પંજાબ નેશનલ બેંક સહિત ઘણી મોટી બેંકોએ તેમના ગ્રાહકોને નોટિસ જારી કરી છે. સ્ટેટ બેંક ઓફ ઇન્ડિયાએ તેના ગ્રાહકોને હડતાળની તારીખોને ધ્યાનમાં રાખીને તેમના જરૂરી બેંકિંગ કાર્ય અગાઉથી પૂર્ણ કરવાની સલાહ આપી છે.