હરિયાણાના મુખ્યમંત્રી નાયબ સિંહ સૈનીએ ભગવી પાઘડી પહેરીને રાજ્યનું બજેટ રજૂ કર્યું. કોંગ્રેસે આ માટે સૈની પર કટાક્ષ કર્યો છે. પંજાબ કોંગ્રેસના પ્રમુખ અમરિંદર સિંહ રાજા વારિંગે કહ્યું કે સૈનીનો તેમના રાજ્ય સાથે કોઈ લેવાદેવા નથી. તેઓ પંજાબની ચૂંટણીઓ પર ધ્યાન કેન્દ્રિત કરે છે. પરંતુ હરિયાણાના મુખ્યમંત્રી ભૂલી ગયા છે કે ફક્ત પોશાક બદલવાથી કંઈ પ્રાપ્ત થતું નથી.
હકીકતમાં,રાજ્યનું બજેટ રજૂ કરતી વખતે હરિયાણાના મુખ્યમંત્રીએ ભગવા રંગની પાઘડી પહેરી હતી. બજેટ રજૂ કરતી વખતે, મુખ્યમંત્રીની ભગવા રંગની પાઘડી રાજકીય ચર્ચાનું કેન્દ્ર બની હતી. કોંગ્રેસે તેને પંજાબ વિધાનસભાની ચૂંટણી સાથે જાડી દીધી. પંજાબ કોંગ્રેસના પ્રમુખ અમરિંદર સિંહ રાજા વારિંગે સૈની પર આકરા પ્રહારો કર્યા. તેમણે કહ્યું કે હરિયાણાના મુખ્યમંત્રીને તેમના પોતાના રાજ્યના રાજકારણ કરતાં પંજાબના રાજકારણમાં વધુ રસ છે. તેથી જ તેમણે ખાસ પ્રસંગે પાઘડી પહેરીને અલગ દેખાવાનો પ્રયાસ કર્યો.
રાજા વારિંગે હરિયાણાના મુખ્યમંત્રી પર કટાક્ષ કરતા કહ્યું, “મને લાગે છે કે નાયબ સિંહ સૈની હવે પંજાબમાંથી ચૂંટણી લડવામાં રસ ધરાવે છે. મુખ્યમંત્રી બન્યા પછી, તેમણે હરિયાણા કરતાં પંજાબમાં વધુ સમય વિતાવ્યો છે. કદાચ તેમને તેમના ગૃહ રાજ્યમાં હાંસિયામાં ધકેલાઈ જવાનો ડર છે અને તેઓ અહીં પોતાની સુસંગતતા સાબિત કરવાની આશા રાખે છે.” તેમણે હરિયાણાના મુખ્યમંત્રીની સરખામણી કેનેડાના ભૂતપૂર્વ વડા પ્રધાન જસ્તીન ટ‰ડો સાથે કરીને તેમની પર હુમલો કર્યો. તેમણે કહ્યું કે ફક્ત પોશાક બદલવાથી કોઈ ફાયદો થતો નથી, પછી ભલે તે પાઘડી હોય કે પરંપરાગત કપડાં. “આમ કરીને ક્્યારેય પણ લોકોનો વિશ્વાસ જીતી શકાય નહીં.”
ભારતીય જનતા પાર્ટીએ નાયબ સિંહ સૈનીને પંજાબમાં પાર્ટીની પકડ મજબૂત કરવાની જવાબદારી સોંપી છે. છેલ્લા કેટલાક મહિનાઓથી, તેઓ નિયમિતપણે રાજ્યનો પ્રવાસ કરી રહ્યા છે, પાર્ટીની બેઠકોને સંબોધિત કરી રહ્યા છે. સૈની સતત હરીફ પક્ષોના નેતાઓને પોતાની પાર્ટીમાં સામેલ કરી રહ્યા છે. તેઓ પંજાબમાં શાસક આમ આદમી પાર્ટી પર પણ સતત નિશાન સાધી રહ્યા છે. આ સમય દરમિયાન, સૈની કોંગ્રેસ પર પણ હુમલો કરી રહ્યા છે. એવું માનવામાં આવે છે કે પંજાબ ચૂંટણીમાં ટિકિટ વિતરણમાં સૈની મુખ્ય ભૂમિકા ભજવશે.
પંજાબ વિધાનસભા ચૂંટણી ૨૦૨૭ માં યોજાવાની છે. ભાજપ, કોંગ્રેસ અને આમ આદમી પાર્ટીએ ચૂંટણીની તૈયારીઓ શરૂ કરી દીધી છે. હાલમાં,આપ સત્તામાં છે. કોંગ્રેસ રાજ્યમાં મુખ્ય વિપક્ષી પાર્ટી છે, જ્યારે ભાજપ ખૂબ જ નબળી સ્થિતિ માં છે. રાજકીય સૂત્રો સૂચવે છે કે ભાજપે આ વખતે પંજાબ ચૂંટણી જીતવાની જવાબદારી હરિયાણાના મુખ્યમંત્રી નાયબ સિંહ સૈનીને સોંપી છે. આ કારણે તેઓ સતત પંજાબનો પ્રવાસ કરી રહ્યા છે.