દાહોદ, જીલ્લા સેવા સદન, દાહોદ ખાતે જીલ્લા સંકલન અને ફરીયાદ સમિતિની બેઠક કલેક્ટર ડો. હર્ષિત ગોસાવીની અધ્યક્ષતામાં યોજાઇ હતી. કલેક્ટરએ તમામ વિભાગોને એક બીજાના સંકલનમાં રહીને પ્રજાકીય પ્રશ્ર્નોનો સત્વરે નિકાલ લાવી જનસુવિધા અને વિકાસના કાર્યોને તીવ્રતાથી આગળ ધપાવવા જણાવ્યું હતું.
બેઠકના પ્રથમ ભાગનો પ્રારંભ જનપ્રતિનિધિઓના પ્રશ્ર્નોથી કરવામાં આવ્યો હતો. બેઠકમાં ધારાસભ્ય મહેશ ભૂરીયા, ધારાસભ્ય મહેન્દ્ર ભાભોર ઉપસ્થિત રહ્યાં હતા. બેઠકમાં જનપ્રતિનિધિઓના પ્રશ્ર્નોનો કલેક્ટરએ સકારાત્મક નિરાકરણ આપ્યું હતું અને સબંધિત અધિકારીઓને જરૂરી સૂચનાઓ આપી હતી.
ધારાસભ્ય મહેશ ભૂરિયાએ નલ સે જલ યોજના અંતર્ગત ઝાલોદ તેમજ જીલ્લામાં થઇ રહેલી કામગીરી બાબતે જણાવ્યું હતું. તેમણે નલ સે જલ યોજના ગરીબો માટેના પ્રાણપ્રશ્ર્ન સમાન પીવાના પાણીની સમસ્યાનો ઉકેલ હોય યોજનાના અમલીકરણમાં આવી રહેલી બાધાઓને દૂર કરવા જણાવ્યું હતું. કલેક્ટર ડો. ગોસાવીએ આ માટે સબંધિત અધિકારીઓને સૂચના આપી હતી અને વિવિધ ગામોમાં થઇ રહેલી કામગીરીની આકસ્મિક મુલાકાત લઇને ચકાસણી કરવામાં આવશે તેમ જણાવ્યું હતું.
સંકલન બેઠકના બીજા ભાગમાં લોક ફરીયાદ તરીકે આવેલા અરજદારોના પ્રશ્ર્નોનું નિરાકરણ કરાયું હતું. તેમજ સીએમ ડેસ્ક બોર્ડની કામગીરીની સમીક્ષા કરવામાં આવી હતી. કલેક્ટરએ અમલીકરણ અધિકારીઓને યોજનાઓને ઝડપથી પૂર્ણ કરી લોકો સુધી વિકાસના ફળ પહોંચતા કરવા જણાવ્યું હતું. બેઠકમાં વિવિધ વિભાગોના એક બીજા સાથેના સંકલનના પ્રશ્ર્નોનું નિવારણ કરાયું હતું.
બેઠકમાં જીલ્લા વિકાસ અધિકારી ઉત્સવ ગૌતમ, પ્રાયોજના વહીવટદાર સ્મિત લોઢા, નિવાસી અધિક કલેક્ટર એ.બી. પાંડોર, ડીઆરડીએ નિયામક બી.એમ. પટેલ સહિતના અધિકારીઓ ઉપસ્થિત રહ્યાં હતા.