ભાવનગર,વલ્લભીપુર તાબેના લાખણકા ગામ નજીક ઢાળ પાસેથી એલ.સી.બી.એ વિદેશી દારૂની ૨૯૮ પેટી ભરેલ આઈશર ટ્રક સાથે ટ્રકના ચાલકને ઝડપી લઇ વિદેશી દારૂ, ટ્રક,મોબાઈલ મળી કુલ રૂ. ૧૬.૬૧ લાખનો મુદ્દામાલ કબજે કર્યો હતો. વિદેશી દારૂ ભરેલા ટ્રકની આગળ કારમાં પાયલોટિંગ કરી રહેલ ભાવનગરનો કુખ્યાત બુટલેગર યોગેશ ચેલારામ કારમાં ફરાર થઈ ગયો હતો.
એલ.સી.બી. પોલીસ કાફલો ગત રાત્રીના વલભીપુર પોલીસ મથક વિસ્તારમાં પેટ્રોલિંગમાં હતો તે દરમિયાન બાતમી મળી હતી કે, ઢસા ગામથી વિદેશી દારૂનો મોટો જથ્થો ભરેલ આઇસર ટ્રક વલભીપુર તરફ આવી ગયો છે. લાખણકા ગામના ઢાળ પાસે વોચમાં રહીને આઇસર ટ્રક નં. જી.જે. ૧૦ – ટીટી ૮૫૪૬ ને અટકાવી ટ્રકની તલાશી લેતા ટ્રકની અંદર વિદેશી દારૂની અલગ અલગ બ્રાન્ડની ૨૯૮ પેટી, કિં. રૂ. ૧૨,૫૦,૪૬૦ મળી આવતા એલ.સી.બી.એ વિદેશી દારૂનો જથ્થો, આઇસર ટ્રક, મોબાઈલ ફોન, એરટેલ કંપનીનું રાઉટર મળી કુલ રૂ. ૧૬,૬૧,૪૬૦ ના મુદ્દામાલ સાથે ટ્રકના ચાલક છગનલાલ મનુ ની ધરપકડ કરી તેની વિરુદ્ધ વલભીપુર પોલીસમાં ગુનો દાખલ કરાવ્યો હતો. ચાલકની પૂછપરછ કરતા દારૂનો આ જથ્થો લેવા માટે ભાવનગરના યોગેશ ચેલારામે તેને ઢસા બોલાવ્યો હોવાનું અને ઢસાથી વિદેશી દારૂનો જથ્થો લઈને તેઓ નીકળ્યા હતા અને ટ્રકના આગળના ભાગે યોગેશ ચેલારામ તેની કારમાં પાયલોટિંગ કરતો હોવાનું ઝણાવ્યું હતું.જો.કે પોલીસે ટ્રકને રોક્તા યોગેશ કારમાં ફરાર થઈ ગયો હતો.