એન્ફોર્સમેન્ટ ડિરેક્ટોરેટ (ED)એ દેશભરની સાત ખાનગી મેડિકલ કોલેજમાં ભારે ભ્રષ્ટાચારના આરોપોને લઈને ગુરુવારે સવારથી મોટું સર્ચ-ઓપરેશન હાથ ધર્યું હતું. ગુજરાતના ગાંધીનગર જિલ્લાના કલોલમાં આવેલી સ્વામિનારાયણ ઇન્સ્ટિટ્યૂટ ઓફ મેડિકલ સાયન્સ એન્ડ રિસર્ચ (SIMSR) સહિત આંધ્રપ્રદેશ, તેલંગાણા, મહારાષ્ટ્ર, મધ્યપ્રદેશ, છત્તીસગઢ, બિહાર, ઉત્તરપ્રદેશ અને દિલ્હીનાં કુલ 15 સ્થળે એકસાથે દરોડા પાડવામાં આવ્યા હતા.
FIRમાં ઘટસ્ફોટ થયો EDએ AC III, CBI, નવી દિલ્હી દ્વારા BNS, 2023 અને ભ્રષ્ટાચાર નિવારણ અધિનિયમ, 1988ની વિવિધ કલમો હેઠળ નોંધાયેલી FIRના આધારે તપાસ શરૂ કરી હતી. FIRમાં ઘટસ્ફોટ થયો છે કે દેશભરની વિવિધ ખાનગી મેડિકલ કોલેજોના પ્રતિનિધિઓ, આરોગ્ય અને પરિવાર કલ્યાણ મંત્રાલય (MoHFW), ભારત સરકાર, નવી દિલ્હી અને રાષ્ટ્રીય તબીબી આયોગ (NMC), નવી દિલ્હી સાથે સંકળાયેલા કેટલાક જાહેર અધિકારીઓ સાથે, મેડિકલ કોલેજોના નિરીક્ષણ સંબંધિત ગુપ્ત માહિતી ગેરકાયદે રીતે મેડિકલ કોલેજો અને મધ્યસ્થીઓને જાહેર કરી રહ્યા હતા, જેના કારણે તેઓ પરિમાણોમાં ફેરફાર કરી શકતા હતા અને મેડિકલ કોલેજોમાં શૈક્ષણિક અભ્યાસક્રમો ચલાવવા માટે મંજૂરી મેળવી શકતા હતા.
FIRમાં એ પણ ઘટસ્ફોટ થયો છે કે ઘણા લોકોએ વચેટિયા તરીકે કામ કર્યું હતું અને મેડિકલ કોલેજોને સંવેદનશીલ માહિતી ગેરકાયદે રીતે જાહેર કરવામાં મદદ કરી હતી અને તેમને છેતરપિંડીભર્યાં આયોજનો કરવામાં મદદ કરી હતી, જેમાં અનુકૂળ નિરીક્ષણ અહેવાલો મેળવવા માટે મૂલ્યાંકનકારોને લાંચ આપવી, અસ્તિત્વમાં ન હોય એવી અથવા પ્રોક્સી ફેકલ્ટીની તહેનાતી અને નિરીક્ષણ દરમિયાન કૃત્રિમ રીતે અનુપાલન પ્રોજેક્ટ કરવા માટે કાલ્પનિક દર્દીઓનો પ્રવેશ સામેલ છે, જોકે આ અંગે સત્તાવાર રીતે ED કે CBIના કોઈ અધિકારી બોલવા તૈયાર નથી.
આ સર્ચ-ઓપરેશન દરમિયાન અનેક મોબાઇલ ફોન, લેપટોપ, સર્વરમાં સંગ્રહિત ડેટા, દસ્તાવેજો અને અન્ય ડિજિટલ પુરાવા જપ્ત કરવામાં આવ્યાં છે. EDનાં સૂત્રોના જણાવ્યા મુજબ, આ કૌભાંડમાં કરોડો રૂપિયાની લાંચની આપ-લે થઈ હોવાનું પ્રાથમિક તપાસમાં સામે આવ્યું છે. હાલ ED અને CBI બંને એજન્સીઓએ આ મામલે મૌન સેવ્યું છે અને કોઈ અધિકારીએ સત્તાવાર નિવેદન આપવાનો ઇનકાર કર્યો છે. તપાસ હજુ ચાલુ છે અને આવનારા દિવસોમાં વધુ ધરપકડો થવાની શક્યતા છે.