રશિયાની વોલ્ખોવ નદીમાં ડૂબી ગયેલા ચારેય ભારતીય વિદ્યાર્થીઓના મૃતદેહ મળી આવ્યા છે. મૃતક વિદ્યાર્થીઓ મહારાષ્ટ્રના જલગાંવ જિલ્લાના રહેવાસી હતા. જલગાંવ જિલ્લા કલેક્ટર આયુષ પ્રસાદના જણાવ્યા અનુસાર, આ દુર્ઘટના ૪ જૂને થઈ હતી. ઘટનાના પ્રથમ બે દિવસમાં બે મૃતદેહ મળી આવ્યા હતા.
આયુષે જણાવ્યું હતું કે રશિયન અધિકારીઓએ સવારે વધુ બે મૃતદેહો મેળવ્યા હતા. મૃતદેહોને મુંબઈ લાવવામાં આવી રહ્યા છે. આ પછી વિદ્યાર્થીઓના મૃતદેહને જલગાંવ જિલ્લામાં તેમના વતન લઈ જવામાં આવશે. ચાર મૃતકો, હર્ષલ અનંતરાવ દેસલે, જીશાન અશફાક પિંજરી, ઝિયા ફિરોઝ પિંજરી અને મલિક ગુલામ ગૌસ મોહમ્મદ યાકુબ, રશિયાની યારોસ્લાવ-ધ-વાઈઝ નોવગોરોડ સ્ટેટ યુનિવસટીમાં મેડિસિનનો અભ્યાસ કરતા હતા. વાસ્તવમાં, મૃતકની સાથે નિશા અને ભૂપેશ નામના વધુ બે વિદ્યાર્થીઓ હતા. બંનેના જીવ બચી ગયા હતા. આ ઘટના અચાનક બની જ્યારે ૧૮ થી ૨૦ વર્ષની વયના વિદ્યાર્થીઓનું જૂથ વોલ્ખોવ નદીના કિનારે લટાર મારતું હતું. અમલનેરનો રહેવાસી જીશાન પિંજરી જ્યારે ડૂબી ગયો ત્યારે તેના માતા-પિતા સાથે વીડિયો કોલ પર હતો. પરિવારજનોએ તેને પાણીમાંથી બહાર આવવા કહ્યું હતું. મૃતક જીશાન અને જીયા ભાઈ-બહેન હતા. જ્યારે દેસલે ભડગાંવનો હતો. રશિયન યુનિવસટીના વહીવટીતંત્રે ભારતીય રાજદૂતને એક સંદેશ મોકલીને વિદ્યાર્થીઓના મૃત્યુ પર શોક વ્યક્ત કર્યો છે.