સુરત,
સમગ્ર ગુજરાતમાં વ્યાજખોરોના ત્રાસથી લોકો ત્રાહીમામ પોકારી ગયાં છે. વ્યાજખોરોના લીધે આપઘાતના બનાવો પણ વધી રહ્યાં છે. તે ઉપરાંત નાંણા લેનાર લોકોને થતી હોરાનગતિઓ પણ ફરિયાદ સ્વરૂપે પોલીસ સ્ટેશન સુધી પહોંચતી હોય છે. ત્યારે અમદાવાદ પોલીસે વ્યાજખોરોના ત્રાસ અને વ્યાજખોરીને અટકાવવા માટે સ્પેશિયલ ડ્રાઈવનું આયોજન કરવામાં આવ્યું છે. શહેરના પોલીસ કમિશ્ર્નર દ્વારા ૩૧ જાન્યુઆરી સુધી એક સ્પેશિયલ ડ્રાઈવ યોજવાનો નિર્ણય લેવામાં આવ્યો છે. સમગ્ર રાજ્યમાં વ્યાજખોરો સામે પાોેલીસે તવાઈ બોલાવી છે. સુરતમાં છેલ્લા ૧૦ દિવસમાં ૧૦૩ ગુના નોંધીને ૧૧૧ જેટલા વ્યાજખોરોની ધરપકડ કરાઈ છે. જ્યારે ૨૬ વોન્ટેડ જાહેર કરાયાં છે.
સુરતમાં આજે વ્યાજખોરો સામે પોલીસ તવાઈ બોલાવી હતી. પાંચથી ૧૫ ટકા વ્યાજ વસૂલતા વ્યાજખોરોની ધરપકડ કરવામાં આવી હતી. પોલીસે સુરતના ઝોન પાંચમાં ૩૦ ગુના દાખલ કર્યાં છે.સુરત શહેરમાં ક્રાઈમ બ્રાન્ચે છેલ્લા બે દિવસમાં ૧૬ વ્યાજખોરો વિરુદ્ધ કાર્યવાહી કરી છે. સુરત ક્રાઈમ બ્રાંચની ટીમે અલગ અલગ ટીમ બનાવી શહેરના અલગ અલગ વિસ્તારમાં ગેરકાયદે ઉચું વ્યાજ વસુલતા ૧૬ જેટલા વ્યાજખોરોને ઝડપી પાડી કાયદેસરની કાર્યવાહી કરી છે.
સુરત શહેર પોલીસ કમિશ્ર્નર અજય તોમરે કહ્યું હતું કે, વ્યાજખોરો સામેની ડ્રાઈવ આમ તો ૨૦૨૨ના ઓક્ટોબર મહિનાથી ચાલુ છે. પરંતુ લોકો સામે નહીં આવતાં છેવટે સરકાર તરફથી આ કાર્યવાહી કરવાની શરૂ કરવામાં આવી હતી. ૨૦૨૨ના ઓક્ટોબરથી ડિસેમ્બર સુધીમાં ૫૩ કેસ નોંધવામાં આવ્યા હતાં અને ૭૨ આરોપીઓની ધરપકડ કરાઈ હતી. જ્યારે ૨૦૨૩ના જાન્યુઆરીમાં સ્પેશિયલ ડ્રાઈવ શરૂ કરતાં જ ૧૦ દિવસમાં ૧૦૩ ગુનાઓ નોંધીને ૧૧૧ આરોપીઓની ધરપકડ કરવામાં આવી છે.
ફતેહગંજ પોલીસે વ્યાજખોરો સામેની કાર્યવાહી માટે લોકદરબારનું આયોજન કર્યું હતું. જેમાં વ્યાજના વિષચક્રમાં ફસાતા લોકોને બચાવવા માહિતી અપાઈ હતી. પોલીસ માઈક પર જાહેરાત કરીને લોકોમાં જાગૃતિ લાવવાનો પ્રયાસ કરી રહી છે. સુરત શેહર ગુજરાતનું આર્થિક પાટનગર છે અને આ પાટનગરમાં દેશભરના અલગ અલગ રાજ્યના લોકો રોજગારીની શોધમાં આવીને વસ્યા છે. શહેરમાં વસીને નાનો મોટો ધંધો કરતા હોવાથી પૈસાની જરૂર હોય છે. ત્યારે કેટલાક અસામાજીક તત્વો આવા લોકોને રૂપિયા વ્યાજ તો આપે છે પણ તેની અવેજમાં વ્યાજની મોટી રકમ પડાવી લેતા હોય છે. આવી સતત ફરિયાદો સુરત પોલીસ સામે આવી રહી છે. ત્યારે સુરત પોલીસ આવા વ્યાજખોરો સામે કડક કાર્યવાહી કરવાની શરૂઆત કરી છે.