વડોદરા,M જર, જમીન ને જોરુ ત્રણેય કજિયાના છોરું…આ કહેવત તમે સાંભળી હશે. જમીન-મિલક્તની ભૂખ લોકોમાં એટલી વધી જાય છે કે, તેઓ આ માટે કોઈનું લોહી વહેડાવતા પણ ખચકાતા નથી. પ્રોપર્ટીના વિવાદમાં દીકરાએ ક્રૂરતાપૂર્વક પોતાની ૭૦ વર્ષની માતાની હત્યા કરી નાખી છે. કથિત રીતે દીકરાએ બોલાચાલી દરમિયાન માતા પર હાથ ઉગામ્યો હતો. તેણે માતાને પાઈપ વડે ફટકારી હતી. પ્રોપર્ટીની માલિકી ટ્રાન્સફર કરવા મુદ્દે માતા અને પુત્ર વચ્ચે બબાલ થઈ હતી.
હિમાંશુ અરોરાએ તેનાં માતા કમલારાનીની હત્યા શુક્રવારે મોડી રાત્રે અથવા શનિવારે કરી હોવાની આશંકા છે. હિમાંશુ ઈલેક્ટ્રિકલ અપ્લાયન્સની દુકાન ચલાવે છે, જે તેના ઘરની નજીક જ આવેલી છે. હિમાંશુની બેઅદબી જુઓ કે તેણે માતાની હત્યા કર્યા પછી રવિવારે તેના મૃતદેહની તસવીરો પોતાના સગા-સંબંધીઓની મોકલી હતી. જે બાદ તેમણે પોલીસને હત્યાની જાણ કરી હતી. માતાની હત્યા કર્યા પછી હિમાંશુ નાસી ના ગયો. તે ઘરમાં જ મૃતદેહ સાથે રહ્યો હતો.
હિમાંશુ આથક ભીડમાં હતો જેથી તેણે પોતાની માતાને કહ્યું હતું કે, દુકાનની માલિકી તેના નામે ટ્રાન્સફર કરી દે. પરંતુ તેની માતાએ ના પાડી હતી. આ જ કારણે માતા-પુત્ર વચ્ચે વારંવાર ઝઘડા થતા હતા. અમને જાણવા મળ્યું છે કે, પ્રોપર્ટી માટે તે પોતાની મમ્મીને ત્રાસ આપતો હતો. બે દિવસ અગાઉ બંને વચ્ચે જોરદાર ઝઘડો થયો હતો. દરમિયાન આવેશમાં આવેલો હિમાંશુ પાઈપ લઈને માતા પર ફરી વળ્યો હતો. હાલ તો અમે હિમાંશુની ધરપકડ કરી છે, તેમ વરાસીયાના ઈનચાર્જ પોલીસ ઈન્સ્પેક્ટર વાયએમ મિશ્રાએ જણાવ્યું છે.
પોલીસના કહેવા અનુસાર, હિમાંશુ અરોરાએ માતાની હત્યા કર્યા પછી તેનો મૃતદહે બે માળના ટેનામેન્ટના પગથિયામાં મૂકી રાખ્યો હતો. એક દિવસ બાદ તેણે મૃતદેહના ફોટોગ્રાસ સંબંધીઓને મોકલ્યા હતા અને તેમણે પોલીસને આ વિશે જાણ કરી હતી. જ્યારે પાડોશીઓએ હિમાંશુને તેની માતા વિશે પૂછતાં તેણે જવાબ આપવાનું ટાળ્યું હતું. હિમાંશુ કુંવારો છે અને તેની માતા સાથે રહેતો હતો. હિમાંશુનો મોટો ભાઈ છેલ્લા કેટલાક વર્ષોથી વડોદરાની સરકારી મેન્ટલ હોસ્પિટલમાં સારવાર લઈ રહ્યો છે. પોલીસને જાણવા મળ્યું કે, હિમાંશુને પાડોશીઓ સાથે ખાસ બનતું નહોતું.
હિમાંશુએ પૂછપરછ દરમિયાન શરૂઆતમાં તો એવું કહ્યું કે, ભવિષ્યમાં તેની મમ્મીને કોઈ તકલીફ ના થાય એ માટે તેણે હત્યા કરી નાખી. જોકે, પ્રોપર્ટીના વિવાદનો મુદ્દો તો પોલીસની તપાસ દરમિયાન બહાર આવ્યો હતો. હિમાંશુ છેલ્લા કેટલાક મહિનાઓથી બિઝનેસમાં આથક સંકટનો સામનો કરી રહ્યો છે.