સિનાલોઆ, ઉત્તરી મેક્સિકોના હાઇવે પર એક મોટો અકસ્માત સર્જાયો છે. વિગતો મુજબ મુસાફરોથી ભરેલી બસ અને ટ્રક વચ્ચે જોરદાર ટક્કર થઈ હતી. આ તરફ આ દર્દનાક અકસ્માતમાં ૧૯ લોકોના મોત થયા હતા અને મોટી સંખ્યામાં લોકો ઘાયલ થયા હતા. આ અકસ્માત મેક્સિકોના નોર્થવેસ્ટર્ન સિનાલોઆ સ્ટેટમાં થયો હતો.
સ્થાનિક મીડિયા અનુસાર આ ઘટના મેક્સિકોના ઉત્તર-પશ્ર્ચિમ સિનાલોઆમાં બની હતી. જોકે સ્થાનિક વહીવટીતંત્ર દ્વારા હજુ સુધી મૃત્યુઆંકનો ખુલાસો કરવામાં આવ્યો નથી. આ અકસ્માત દરિયાકિનારાના ધોરીમાર્ગ પર થયો હતો જે બીચ-ફ્રન્ટ શહેરો માઝાટલાન અને લોસ મોચીસને જોડે છે. આ ભયાનક અકસ્માતને કારણે હાઈવે પર વાહનોની અવરજવર બંધ થઈ ગઈ હતી.
મહત્વનું છે કે, અકસ્માતની કેટલીક તસવીરો પણ સામે આવી છે જેમાં જોઈ શકાય છે કે, સવારે થયેલા આ અકસ્માતમાં વાહનના ટુકડા થઈ ગયા હતા અને આગ લાગી હતી. અકસ્માત બાદ ઈમરજન્સી સેવાઓ તાત્કાલિક ઘટનાસ્થળે પહોંચી ગઈ હતી અને ઈજાગ્રસ્તોને હોસ્પિટલમાં લઈ જવામાં આવ્યા હતા.