1 જાન્યુઆરીએ અમેરિકાના લુઇસિયાના રાજ્યના ન્યૂ ઓર્લિયન્સ શહેરમાં એક વ્યક્તિએ ઉજવણી કરી રહેલા લોકો પર પીકઅપ ટ્રક ચલાવી હતી. આમાં ઓછામાં ઓછા 10 લોકોએ જીવ ગુમાવ્યા છે. તે જ સમયે, 30 થી વધુ લોકો ઘાયલ થયા છે. આ ઘટના બોર્બન સ્ટ્રીટ પર બની હતી.
CNN અનુસાર, ત્યાં હાજર લોકોએ જણાવ્યું કે એક ઝડપી વાહન આવ્યું અને લોકો પર ટ્રક ચઢાવી દીધું. આ પછી એક વ્યક્તિ તેમાંથી નીચે ઉતર્યો. તેણે લોકો પર ગોળીબાર શરૂ કર્યો, જેના જવાબમાં પોલીસ ફોર્સે પણ ફાયરિંગ કરવું પડ્યું. હુમલાખોર પકડાયો છે કે કેમ તે અંગેની માહિતી હજુ ઉપલબ્ધ નથી.
ABC ન્યૂઝે પોલીસ પ્રવક્તાને ટાંકીને કહ્યું કે એવું લાગે છે કે હુમલો ઇરાદાપૂર્વક કરવામાં આવ્યો હતો. આ ઘટના બાદ નવા વર્ષની ઉજવણીનો માહોલ શોકમાં ફેરવાઈ ગયો હતો. પોલીસ આ મામલે તપાસ કરી રહી છે. ઘાયલ લોકોને ન્યૂ ઓર્લિયન્સની હોસ્પિટલમાં દાખલ કર્યા છે.
આ પહેલાં 25 ડિસેમ્બરે જર્મનીમાં પણ આવો જ એક અકસ્માત થયો હતો. સાઉદીના એક ડોક્ટરે મેગડેબર્ગ શહેરના બજારમાં લોકો પર કાર ચલાવી હતી. આ ઘટનામાં પાંચનાં મોત થયા હતા અને 200થી વધુ લોકો ઘાયલ થયાં હતાં.
લુઇસિયાનાના ગવર્નર જેફ લેન્ડ્રીએ આ અકસ્માતને ‘ભયંકર’ ગણાવ્યો છે. તેમણે સોશિયલ મીડિયા પર અકસ્માતમાં ઘાયલ થયેલા લોકો માટે પ્રાર્થના કરવા કહ્યું. ન્યૂ ઓર્લિયન્સના મેયર લાટોયા કેન્ટ્રેલે આ ઘટનાને આતંકવાદી હુમલો ગણાવ્યો છે. તેમણે કહ્યું કે ઘટના હજુ તપાસ હેઠળ છે.