શ્રીનગર, ઉત્તર કાશ્મીરના બારામુલા જિલ્લાના ઉરી વિસ્તારમાં બુધવારે એક વાહન અકસ્માતનો ભોગ બનીને ઊંડી ખીણમાં પડી ગયું હતું. આ અકસ્માતમાં સાત લોકોના મોત થયા છે અને લગભગ આઠ લોકો ઘાયલ થયા છે. અકસ્માતની જાણ થતા જ આસપાસના લોકો ઘટના સ્થળે પહોંચી ગયા હતા. પોલીસને પણ જાણ કરવામાં આવી હતી. ઈજાગ્રસ્તોને સારવાર માટે નજીકની હોસ્પિટલમાં લઈ જવામાં આવ્યા હતા. હિમવર્ષાના કારણે તીવ્ર ઠંડી અને લપસણી સ્થિતિ વચ્ચે બચાવ કામગીરી હાથ ધરવામાં આવી હતી. આ દરમિયાન અરાજક્તાનો માહોલ જોવા મળ્યો હતો. હોસ્પિટલમાં હોબાળો મચી ગયો હતો.
મળતી માહિતી મુજબ, બુધવારે બપોરે ઉરીના બુજથાલન તાતમુલ્લા વિસ્તારમાં એક વાહન રસ્તા પરથી લપસીને ઊંડી ખાઈમાં પડી ગયું હતું. ઓછામાં ઓછા સાત લોકો માર્યા ગયા અને ઘણા લોકો ઘાયલ થયા. એક પોલીસ અધિકારીએ જણાવ્યું હતું કે અકસ્માત સ્થળ પર તાત્કાલિક બચાવ કામગીરી શરૂ કરવામાં આવી હતી. તેમણે કહ્યું કે હિમવર્ષાને કારણે રસ્તો ઘણો લપસણો બની ગયો છે. ઈજાગ્રસ્તોને સારવાર માટે જીએમસી બારામુલા લઈ જવામાં આવ્યા છે.