- યુકેના વિદેશ મંત્રીએ ભારતીય સમકક્ષ એસ જયશંકર સાથે દ્વિપક્ષીય વાટાઘાટો કરી.
નવીદિલ્હી,
યુકેએ બીબીસી ઓફિસમાં આઈટી વિભાગ દ્વારા કરવામાં આવેલા સર્વેનો મુદ્દો ઉઠાવ્યો છે. યુકેના વિદેશ મંત્રી જેમ્સ ક્લેવરલીએ પોતે આ અંગે માહિતી આપી છે. ગયા મહિને, ટેક્સ અધિકારીઓએ નવી દિલ્હી અને મુંબઈમાં બીબીસીની ઓફિસની તપાસ કરી હતી. ક્લેવરલીએ જણાવ્યું કે તેમણે ગયા મહિને બીબીસીની દિલ્હી અને મુંબઈ ઓફિસમાં તેમના ભારતીય સમકક્ષ એસ જયશંકર સાથે દ્વિપક્ષીય વાટાઘાટો દરમિયાન આવકવેરા વિભાગના સર્વેક્ષણનો મુદ્દો ઉઠાવ્યો હતો. ગયા મહિને ત્રણ દિવસ સુધી બીબીસીની ઓફિસની સર્ચ કરવામાં આવી હતી. લંડન સ્થિત બીબીસી દ્વારા યુકેમાં વિવાદાસ્પદ ડોક્યુમેન્ટરી ’ઈન્ડિયા: ધ મોદી ક્વેશ્ર્ન’ પ્રસારિત થયાના અઠવાડિયા પછી આવકવેરા વિભાગ દ્વારા આ સર્વે હાથ ધરવામાં આવ્યો હતો. ડોક્યુમેન્ટ્રીમાં વડાપ્રધાન નરેન્દ્ર મોદી અને ૨૦૦૨ના ગુજરાત રમખાણોનો સંદર્ભ આપવામાં આવ્યો હતો. બીબીસીના કાર્યાલયોની શોધ કર્યા પછી આઈટી વિભાગે દાવો કર્યો હતો કે તેની આવક, અથવા વિવિધ સંસ્થાઓ દ્વારા દર્શાવવામાં આવેલ નફો, ’ભારતમાં કામગીરીના ધોરણને અનુરૂપ નથી’. સર્વેક્ષણ પછીના તેના નિવેદનમાં, સેન્ટ્રલ બોર્ડ ઓફ ડાયરેક્ટ ટેક્સિસે જણાવ્યું હતું કે તેને વિસંગતતાઓ મળી છે અને સંસ્થાના એકમો દ્વારા જાહેર કરાયેલ આવક અને નફો ભારતમાં કામગીરીના સ્કેલ સાથે સુસંગત નથી.
બીબીસીનો બચાવ આ અઠવાડિયાની શરૂઆતમાં યુકે સરકારે સંસદમાં બીબીસી અને તેની સંપાદકીય સ્વતંત્રતાનો મજબૂત બચાવ કર્યો અને કહ્યું: અમે બીબીસીની સાથે છીએ. અમે બીબીસીને ફંડ આપીએ છીએ. અમને લાગે છે કે બીબીસી વર્લ્ડ સવસ મહત્વપૂર્ણ છે. હાઉસ ઓફ કોમન્સમાં એક તાત્કાલિક પ્રશ્ર્નના જવાબમાં સંસદીય અન્ડર-સેક્રેટરી, ડેવિડ રુટલીએ જણાવ્યું હતું કે સરકાર આઇટી વિભાગ દ્વારા ચાલી રહેલી તપાસ પર કરવામાં આવેલા આરોપો પર ટીપ્પણી નહીં કરે પરંતુ મીડિયાની સ્વતંત્રતા અને વાણી સ્વાતંત્ર્યને હંમેશા સમર્થન આપશે.
ભારતીય વિદેશ મંત્રી એસ જયશંકરે બીબીસી ઓફિસ પર કરવામાં આવેલા આઇટી સર્વેને લઈને બ્રિટનને આકરો જવાબ આપ્યો છે. તેમણે કહ્યું કે સંગઠન કોઈ પણ હોય, તેણે ભારતીય કાયદાઓનું પાલન કરવું પડશે. જયશંકરે યુકેના વિદેશ સચિવ જેમ્સ ક્લેવરલીને જણાવ્યું હતું કે ભારતમાં કાર્યરત તમામ સંસ્થાઓએ સંબંધિત કાયદાઓનું સંપૂર્ણ પાલન કરવું જોઈએ.
અગાઉ બ્રિટિશ વિદેશ મંત્રીએ બીબીસી ટેક્સ સંબંધિત મુદ્દો વિદેશ મંત્રી એસ. જયશંકર સમક્ષ ઉઠાવ્યો હતો. જેના જવાબમાં તેમણે આ વાતો કહી. આવકવેરા વિભાગની ટીમે મુંબઈ અને દિલ્હીમાં બીબીસીની ઓફિસો પર સતત ૩ દિવસ દરોડા પાડ્યા હતા. આ દરમિયાન આઈટી વિભાગે ઓફિસમાંથી ઘણા દસ્તાવેજો રિકવર કર્યા હતા. સર્વે દરમિયાન અનેક કર્મચારીઓના મોબાઈલ ફોન જપ્ત કરવામાં આવ્યા હતા.
ભૂતકાળમાં તેને લઈને ઘણો વિવાદ થયો હતો. વિપક્ષના લોકોએ કેન્દ્રની મોદી સરકાર પર જોરદાર નિશાન સાધ્યું હતું. વિરોધ પક્ષોએ કહ્યું હતું કે મોદી સરકારે બદલાની ભાવનાથી આ પગલું ભર્યું છે. તમને જણાવી દઈએ કે પીએમ મોદી પર બનેલી બીબીસી ડોક્યુમેન્ટ્રી પછી આ આખો વિવાદ ઊભો થયો હતો. આ ડોક્યુમેન્ટ્રીમાં ૨૦૦૨ના ગુજરાત રમખાણો બતાવવામાં આવ્યા છે, આ સમયે નરેન્દ્ર મોદી ગુજરાતના મુખ્યમંત્રી હતા.
એક ટ્વિટમાં, જયશંકરે કહ્યું કે બંને પક્ષોએ દ્વિપક્ષીય સંબંધોમાં પ્રગતિની સમીક્ષા કરી અને વૈશ્ર્વિક સ્થિતિ તેમજ જી૨૦ એજન્ડા પર વિચારોનું આદાન-પ્રદાન કર્યું. તેમણે કહ્યું, સવારની શરૂઆત બ્રિટિશ વિદેશ સચિવ જેમ્સ ક્લેવરલી સાથે દ્વિપક્ષીય બેઠક સાથે થઈ. છેલ્લી ચર્ચાથી અમારા સંબંધોમાં પ્રગતિની સમીક્ષા કરી. યંગ પ્રોફેશનલ સ્કીમના પ્રારંભ પર વિશેષ ધ્યાન આપવામાં આવ્યું હતું. તેઓએ વૈશ્ર્વિક પરિસ્થિતિ તેમજ જી-૨૦ એજન્ડા પર મંતવ્યોનું આદાન-પ્રદાન કર્યું હતું.