અબુધાબી,
યુએઈના ઉપરાષ્ટ્રપતિ અને વડાપ્રધાને અલ મિન્હાદ જિલ્લા અને તેની આસપાસના વિસ્તારોનું નામ બદલી ‘હિન્દ સિટી’ કરવાની જાહેરાત કરી છે. યુએઈની સત્તાવાર સમાચાર એજન્સી ડબલ્યૂએએમે આ અંગેની માહિતી આપી છે.
સુત્રોના જણાવ્યા મુજબ શહેરને ૪ ક્ષેત્રોમાં વહેંચી ક્રમશ: હિન્દ-૧, હિન્દ-૨, હિન્દ-૩ અને હિન્દ-૪ નામ રખાયા છે. આમાં સંયુક્ત આરબ અમિરાતના રહેવાસીઓ માટેના ઘરો છે. હિન્દ સિટીનો વિસ્તાર ૮૩.૯ કિ.મી.ના ક્ષેત્રમાં ફેલાયેલો છે. ઉપરાંત આ શહેર અમીરાત રોડ દુબઈ-અલ એન રોડ અને જેબેલ અલી-લેહબાબ રોડ જેવા મુખ્ય રસ્તાઓ સાથે જોડાયેલો છે. દુબઈના શાસનના નિર્દેશ અનુસાર અલ મિન્હાદ ક્ષેત્ર અને તેની આસપાસના ક્ષેત્રનું નામ બદલીને હિન્દસિટી કરાયું છે.
અગાઉ વર્ષ ૨૦૧૦માં દુબઈની પ્રખ્યાત બિલ્ડીંગ બુર્જ દુબઈનું નામ બદલવામાં આવ્યું હતું. તે દરમિયાન સંયુક્ત આરબ અમીરાતના રાષ્ટ્રપતિ અને અબુધાબીના શાસક શેખ ખલીફા બિન જાયદ અલ નાહયાને બુર્જ દુબઈનું નામ બદલીને બુર્જ ખલીફા કરી દીધું હતું. ગત વર્ષે ૧૩ મે-૨૦૨૨ના રોજ અબુ ધાબીના શાસક શેખ ખલીફા બિન જાયદ અલ નાહયાનનું નિધન થયું હતું.
શેખ મોહમ્મદ બિન રાશિદ અલ મક્તૂમે અલ મિન્હાદ જિલ્લાનું નામ બદલીને હિન્દ સિટી કરી દીધું છે. તેઓ સંયુક્ત આરબ અમીરાત (UAE)ના ઉપરાષ્ટ્રપતિ, વડાપ્રધાન અને સંરક્ષણ મંત્રી હોવા ઉપરાંત દુબઈના શાસક પણ છે. તેઓ યુએઇના પૂર્વ ઉપરાષ્ટ્રપતિ અને દુબઈના શાસક શેખ રાશિદ બિન સઈદ અલ મક્તૂમના ત્રીજા પુત્ર છે. વર્ષ ૨૦૦૬માં તેમના ભાઈ મક્તૂમના નિધન બાદ તેમણે ઉપરાષ્ટ્રપતિ અને શાસક તરીકેનો પદભાર સંભાળ્યો હતો. અલ મક્તૂમ વિશ્વના મુખ્ય રિયલ એસ્ટેટ ડેવલપર્સ તરીકે પણ ઓળખાય છે.