યુક્રેનના રાષ્ટ્રપતિ વોલોડિમીર ઝેલેન્સ્કીને અમેરિકી રાષ્ટ્રપતિ ટ્રમ્પ સાથે વિવાદ થયા બાદ તેમને વ્હાઇટ હાઉસમાંથી બહાર કરવામાં આવ્યા. બંને નેતા વચ્ચે શુક્રવારે 40 મિનિટ સુધી શાંતિથી વાતચીત થઈ, પણ જ્યારે છેલ્લી 10 મિનિટ ઉગ્ર ચર્ચાઓ થઈ.
CNNના રિપોર્ટ પ્રમાણે વ્હાઇટ હાઉસના એક અધિકારીએ જણાવ્યું હતું કે ઉગ્ર ચર્ચા બાદ યુક્રેનના ડેલિગેટ્સ ઓવલ ઓફિસમાંથી બહાર આવીને બીજા રૂમમાં જતા રહ્યા હતા, જ્યારે અમેરિકી ટીમ ત્યાં રોકાઈ રહી. આ દરમિયાન ટ્રમ્પે ઉપરાષ્ટ્રપતિ વેન્સ, વિદેશમંત્રી રુબિયો અને NSA માઇક વોલ્ટ્ઝ સાથે વાતચીત કરી.ચર્ચા દરમિયાન ટ્રમ્પે કહ્યું હતું કે ઝેલેન્સ્કી વાતચીતની પરિસ્થિતિમાં નથી. ત્યાર બાદ તેમણે માઇક વોલ્ટ્ઝ અને રુબિયોને કહ્યું હતું કે તેઓ જ જઈને ઝેલેન્સ્કીને કહી દે કે તેમના રવાના થવાનો સમય થઈ ગયો છે.
આ બંને અધિકારીઓ ત્યાં પહોંચ્યા ત્યારે ઝેલેન્સ્કીએ તેમને કહ્યું હતું કે તેઓ દરેક વસ્તુ ઠીક કરી શકે છે. ઝેલેન્સ્કીએ ફરીથી ટ્રમ્પ સાથે વાતચીત કરવાની ઇચ્છા વ્યક્ત કરી, પરંતુ તેમને આ તક મળી નહીં. બંને નેતાની જોઇન્ટ પ્રેસ-કોન્ફરન્સ પણ થવાની હતી, જેને રદ કરી દેવામાં આવી.
ઝેલેન્સ્કીએ કહ્યું- સુરક્ષાની ખાતરી આપવામાં આવે ત્યારે જ તેઓ શાંતિ કરારમાં જોડાશે
ઝેલેન્સ્કીએ ટ્રમ્પ સાથે ઉગ્ર વાતચીત બાદ તેમની માફી માગવાની ના પાડી દીધી. તેમણે ફોક્સ ન્યૂઝને જણાવ્યું હતું કે જ્યાં સુધી સુરક્ષાની ખાતરી ન મળે ત્યાં સુધી તેઓ કોઈપણ શાંતિ કરારમાં ભાગ લેશે નહીં.ઝેલેન્સ્કીએ કહ્યું હતું કે તેઓ ટ્રમ્પનું સન્માન કરે છે, પરંતુ તેમણે કંઈ ખોટું કર્યું નથી. તેમણે એમ પણ કહ્યું હતું કે આ ચર્ચા તેમના બંનેમાંથી કોઈ માટે સારી નહોતી, પરંતુ ટ્રમ્પે સમજવાની જરૂર છે કે યુક્રેન રાતોરાત રશિયા પ્રત્યેનું પોતાનું વલણ બદલી શકશે નહીં.
ઝેલેન્સ્કીએ કહ્યું હતું કે તેઓ ઈચ્છે છે કે ટ્રમ્પ આ ચર્ચા પછી પણ યુક્રેન માટે વધુ સમર્થન દર્શાવે. યુક્રેન ક્યારેય અમેરિકાને ભાગીદાર તરીકે ગુમાવવા માગતો નથી. ઝેલેન્સ્કીએ કહ્યું હતું કે યુક્રેન રશિયા સાથે શાંતિ કરારમાં જોડાશે નહીં, જ્યાં સુધી તેમને સુરક્ષાની સંપૂર્ણ ગેરંટી ન મળે.
ટ્રમ્પે કહ્યું- ઝેલેન્સ્કી શાંતિ ઇચ્છતા નથી ટ્રમ્પ પણ વ્હાઇટ હાઉસની બહાર ગયા. પત્રકારો સાથે વાત કરતાં તેમણે કહ્યું હતું કે ઝેલેન્સ્કી બિલકુલ શાંતિ ઇચ્છતા નથી. ટ્રમ્પે દાવો કર્યો હતો કે પુતિન શાંતિ પ્રત્યે ગંભીર હતા. યુક્રેનને સહાય રોકવાના પ્રશ્ન પર ટ્રમ્પે કહ્યું કે હવે કોઈ વાંધો નથી. હવે તેઓ ફક્ત ત્યારે જ વાત કરશે જ્યારે ઝેલેન્સ્કી ખરેખર આ યુદ્ધનો અંત લાવવા ઇચ્છશે.
આ દરમિયાન ઘણા યુરોપિયન નેતાઓએ ઝેલેન્સ્કીને પોતાનો ટેકો વ્યક્ત કર્યો છે. નોર્વે, નેધરલેન્ડ, પોલેન્ડ જેવા યુરોપિયન દેશો ઉપરાંત યુરોપિયન યુનિયન, જર્મની, બ્રિટન, કેનેડા અને ઓસ્ટ્રેલિયાએ પણ ઝેલેન્સ્કીને ટેકો આપ્યો છે.