તમિલનાડુના તિરુચિરાપલ્લીમાં એક ટ્રેન પેસેન્જર પાસેથી સોનાના દાગીના અને મોટી રકમની રોકડ મળી આવી છે. રેલવે પ્રોટેક્શન ફોર્સે મુસાફર પાસેથી રૂ. ૧.૮૯ કરોડના સોનાના દાગીના અને રૂ. ૧૫ લાખની રોકડ જપ્ત કરી છે. ‘ઓપરેશન વિજિલન્ટ’ અંતર્ગત પ્રતિબંધિત વસ્તુઓની ગેરકાયદેસર હેરફેર અને મુસાફરોના સામાનની ચોરી જેવા ગુનાઓ સામે નિયમિત તપાસ ચલાવતી આરપીએફની ટીમે બુધવારે શંકાના આધારે એક મુસાફરની અટકાયત કરી હતી.
અટકાયત કરાયેલ વ્યક્તિની ઓળખ આર લક્ષ્મણન તરીકે કરવામાં આવી છે, જે ચેન્નાઈ એગ્મોર-મેંગલુરુ એક્સપ્રેસમાં ચેન્નાઈ એગમોરથી તિરુચિરાપલ્લી આવ્યો હતો. જ્યારે અધિકારીઓએ તેના ખભા પર લટકેલી કાળી બેગની તપાસ કરી, ત્યારે તેમને તેની અંદર બીજી બેગ મળી, જેમાં ૧૫ લાખ રૂપિયા રોકડા અને ૨૭૯૬ ગ્રામ સોનાના દાગીના હતા, જેની કિંમત આશરે ૧.૮૯ કરોડ રૂપિયા હતી. જપ્ત કરાયેલા સામાનની કુલ કિંમત ૨.૦૪ કરોડ રૂપિયા છે.
વધુ તપાસમાં જાણવા મળ્યું કે લક્ષ્મણને આ વસ્તુઓને મદુરાઈમાં વિતરણ માટે ટ્રેન દ્વારા ગેરકાયદેસર રીતે પરિવહન કર્યું હતું. જપ્ત કરાયેલી રોકડ અને સોનું વધુ તપાસ માટે આવકવેરા વિભાગને સોંપવામાં આવ્યું હતું.