મોરબી,
ટંકારા તાલુકાનાં ગ્રામ્ય વિસ્તારમાં રહેતી ૧૮ વર્ષની દીકરીનો દેહ તેનો સગો બાપ છેલ્લા પાંચેક વર્ષથી અભડાવી રહ્યો હતો અને મારકુટ કરીને જાનથી મારી નાખવાની ધમકી આપતો હતો જેથી તે યુવતીએ પોલીસને આ અંગેની જાણ કરતાં ટંકારા પોલીસે આ યુવતીને સખી વન સ્ટોપ સેન્ટર ખાતે પહોચાડી હતી. ત્યાં યુવતીએ તેની આપવિતી જણાવતા તેના પિતાની સામે ગુનો નોંધીને તેને પકડવા માટે પોલીસે તજવીજ શરૂ કરી છે.
બનાવની જાણવા મળતી માહિતી મુજબ ટંકારા પોલીસ સ્ટેશનના જમાદાર વિજયભાઈ બાર, મહિલા કોન્સ્ટેબલ પુજાબેન ડાંગર અને ડ્રાઈવર રણુભા ઝાલા ગ્રામ્ય વિસ્તારમાં પેટ્રોલીંગમાં હતા ત્યારે એક ૧૮ વર્ષની યુવતી તેની પાસે આવી હતી અને તેને પોતાને ધરે નથી જવું તેવું કહ્યું હતું જેથી તે યુવતીને પોલીસે મોરબી સખી વન સ્ટોપ ખાતે પહોચાડી હતી તે યુવતીનું કાઉન્સિલ કરવમાં આવતા ટંકારા પોલીસ મથકે સખી સેન્ટરમાંથી ફોન કરીને આ યુવતી સગીરા હતી ત્યારથી એટ્લે કે છેલ્લા પાંચ વર્ષથી તેનો સગો બાપ આ યુવતીના દેહને અભડાવી રહ્યો હતો અને તેને જાનથી મારી નાખવાની ધમકી આપી મારકુટ કરતો હતો.
ટંકારાના પોલીસ અધિકારી એચ.આર. હેરભાએ ભોગ બનનારની હકીક્ત આધારે આઈપીસી કલમ ૩૭૬ (૨), (એફ), (જે)મ (કે), (એન), ૩૨૩, ૫૦૬(૨) તથા પોસ્કો એક્ટ ૫ (એલ), (એન)(૬) મુજબ ગુનો નોંધી આરોપીને પકડવા ચક્રો ગતિમાન કર્યા છે વધુમાં મળતી માહિતી મુજબ ભોગ બનનાર સગિરાએ જણાવ્યું હતું કે, છેલ્લા પાંચેક વર્ષથી એના પિતા મારકુટ કરીને જાનથી મારી નાખવાની ધમકી આપતા હતા અને જાતિય હુમલા કરતાં હતા જેથી પોલીસે હાલમાં તેના હેવાન બાપ સામે ફરિયાદ નોંધાવતાં દીકરીનો દેહ અભડાવનાર નરાધમ સામે ચોમેરથી ફિટકાર વરસી રહ્યો છે.