- સાંજના સમયે ભારે બફારાના કારણે લોકો ત્રાહિમામ પોકારી ઊઠયા.
બાલાસીનોર, બાલાસિનોર પંથકમાં ઘણા દિવસોથી કાળઝાળ ગરમી પડી રહી છે અને 3 દિવસથી સતત તાપમાનમાં પણ વધારો થઈ રહ્યો છે. રવિવારનું મહત્તમ તાપમાન 44 ડિગ્રી સેલ્સિયસ નોંધાવા પામ્યું છે. ગરમીના કારણે માણસોથી લઈ પશુ પક્ષીઓ પણ ત્રાહિમામ પોકારી ઊઠયા છે. અસહ્ય ગરમીના કારણે લોકોના જનજીવન પર અસર જોવા મળી રહી છે.
બાલાસિનોર નગર તેમજ તાલુકામાં ગ્રામ્ય વિસ્તારમાં છેલ્લા 3 દિવસથી 40 ડિગ્રીથી વધુ તાપમાન નોંધાયું છે. સાંજના સમયે ભારે બફારાના કારણે લોકો ત્રાહિમામ પોકારી ઊઠયા છે. ગરમીના કારણે ખાસ કરીને બપોરના 1 થી 4 ના સમયગાળામાં લોકો બહાર જવાનું ટાળે છે અને ઘરમાં પુરાઈ રહે છે. નગરના કોર્ટ રોડ, મેઈન બજાર, રાજપુરી દરવાજા સહિતના વિસ્તારોમાં વાહનચાલકો સહિત રાહદારીઓની ઓછી ચહલપહલ જોવા મળે છે. રવિવારની રજા હોવા છતાં પણ લોકોને મોડે સુધી ઘરમાં પુરાઈ રહેવાની ફરજ પડી હતી. આરોગ્ય તંત્ર દ્વારા પણ લોકો હિટવેવનો ભોગ ન બને તે હેતુસર પૂરતા પ્રમાણમાં શરીરમાં પાણી, લીંબુ સરબત પીવો તેવી અપીલ કરાઇ છે. આગામી દિવસોમાં બાલાસિનોર સહિત સમગ્ર તાલુકામાં તાપમાનનો ધારો વધે તો નવાઈ નહી રહે.