સુરતના કાપોદ્રા વિસ્તારમાં એક 17 વર્ષની કિશોરીએ ઘઉંમાં નાખવાની દવા પીને આપઘાત કરી લીધો હતો. દવા પી લીધા બાદ બેભાન થઈને ઢળી પડતા કિશોરીને પરિવાર હોસ્પિટલ લઈને પહોંચ્યો હતો. જ્યાં તેણે મરતા પહેલાં જે જણાવ્યું તે જાણીને પરિવાર પણ ચોંકી ગયો હતો. કિશોરીએ જણાવ્યું હતું કે, નિલેશે કીધું હતું કે મરીજા. કિશોરીએ નિલેશને પોતાનો ઘરવાળો હોવાનું જણાવ્યું હતું. કિશોરીને મરવા મજબૂર કરનાર આરોપી સામે પરિવારે આપઘાતની દુષ્પ્રેરણાનો ગુનો નોંધાવતા કાપોદ્રા પોલીસે તેની ધરપકડ કરી હતી.
કિશોરીને ચક્કર આવતા નીચે પડી ગઈ હતી મળતી માહિતી પ્રમાણે, મૂળ ભાવનગરના વતની અને સુરતના નાના વરાછા વિસ્તારમાં 17 વર્ષીય કિશોરી પરિવાર સાથે રહેતી હતી. પરિવારમાં માતા-પિતા, એક ભાઈ અને એક બહેન છે. માતા-પિતા પ્રાઇવેટ સફાઈ કામદાર તરીકે કામ કરી પરિવારનું ગુજરાન ચલાવી રહ્યા છે. સવારના નવ વાગ્યાની આસપાસ કિશોરી ઘરે હાજર હતી. કિશોરી બાથરૂમમાં નાહવા માટે ગઈ હતી. ત્યાર બાદ બહાર નીકળતા તેને ચક્કર આવતા તે નીચે પડી ગઈ હતી.
દીકરી બેભાન થઈને ઢળી પડતા પિતાએ પત્નીને ઘરે આવવા જણાવ્યું હતું. ત્યાર બાદ કિશોરીને રિક્ષામાં લઈ પરિવાર હોસ્પિટલ પહોંચ્યો હતો. જ્યાં હોસ્પિટલના તબીબો દ્વારા કિશોરીએ દવા પીધી હોવાનું જણાવ્યું હતું. આ બાબતે પરિવારજનો દ્વારા પણ તપાસ કરવામાં આવતા કિશોરીએ ઘઉંમાં નાખવાની દવા પીધી હોવાનું જાણવા મળ્યું હતું. ખાનગી હોસ્પિટલમાં કિશોરીની સારવાર કરવામાં આવી રહી હતી. તે દરમિયાન ટૂંક સારવારમાં જ કિશોરીનું મોત નીપજ્યું હતું.
ડોક્ટરે કિશોરીના મોત પહેલાં વીડિયો બનાવ્યો કિશોરીના મોત પહેલાં ડોક્ટર દ્વારા તેની પૂછપરછનો વીડિયો બનાવવામાં આવ્યો હતો. જેમાં કિશોરીએ એવું જણાવ્યું હતું કે, મેં ઘઉંમાં નાખવાની દવા પીધી છે અને ડોક્ટરે પૂછતા જણાવ્યું હતું કે, નિલેશે કીધું હતું કે મરીજા. ત્યાર બાદ ડોક્ટરે કિધું કે કોણ નિલેશ તો કિશોરીએ કહ્યું કે, મારો ઘરવાળો છે તેમ આ વીડિયોમાં જણાવતી હતી. ત્યાર બાદ ડોક્ટરે આ વીડિયો પિતા અને માતાને દેખાડ્યો હતો. જે જોતા આ નિલેશના લીધે કિશોરીએ દવા પીધી હોવાનું જાણવા મળ્યું હતું. કુવારી દીકરી કોઇ નિલેશને પોતાનો ઘરવાળો કહેતી હોવાથી પિતા અને માતા પણ ચોંકી ગયા હતા.
આ વીડિયોના આધારે પિતા દ્વારા દીકરીને મરવા મજબૂર કરનાર નિલેશ બોરીચા સામે આપઘાતની દુષ્પ્રેરણાનો ગુનો નોંધાવવામાં આવ્યો હતો. જેથી પોલીસે કિશોરીના ડાઈંગ ડિક્લેરેશનના આધારે નિલેશની શોધખોળ કરી હતી. પોલીસ તપાસમાં જાણવા મળ્યું હતું કે, છેલ્લા બે-ત્રણ વર્ષથી કિશોરી અને 21 વર્ષીય નિલેશ બોરીચા વચ્ચે પ્રેમ સંબંધ હતો. ગઈકાલે બંને વચ્ચે કોલ પર વાત થઈ હતી. દરમિયાન નિલેશની સગાઈની અન્ય છોકરી સાથે વાત ચાલી રહી હોવાનું કિશોરીને જણાવ્યું હતું. જેથી કિશોરીએ નિલેશને પોતાની સાથે સગાઈ કરવા માટે જણાવ્યું હતું. જેથી નિલેશે ના પાડતા કિશોરીને માઠું લાગી આવ્યું હતું.
કાપોદ્રા પોલીસે આરોપીને ઝડપી પાડી કોર્ટમાં રજૂ કર્યો જોકે, આ ઘટનાને પગલે કાપોદ્રા પોલીસે નિલેશ બોરીચાને ઝડપી પાડ્યો હતો. નિલેશ મૂળ ભાવનગર જિલ્લાના ગારિયાધારનો રહેવાસી છે. કાપોદ્રા પોલીસ દ્વારા કાયદેસરની કાર્યવાહી હાથ ધરીને નિલેશને કોર્ટમાં રજૂ કર્યો હતો.