અરવિંદ કેજરીવાલને સુપ્રીમ કોર્ટ તરફથી મોટો ઝટકો લાગ્યો છે. સુપ્રીમ કોર્ટે તેમની જામીન ૭ દિવસ માટે લંબાવવાની અરજી ફગાવી દીધી છે. હવે કેજરીવાલે ૨ જૂને આત્મસમર્પણ કરવું પડશે.
દિલ્હીના સીએમ અરવિંદ કેજરીવાલે સુપ્રીમ કોર્ટને તેમની વચગાળાની જામીન લંબાવવાની અરજી પર તાત્કાલિક સુનાવણી કરવાની અપીલ કરી હતી. કેજરીવાલે કોર્ટને તેમની વચગાળાની જામીન તબીબી તપાસ માટે વધુ ૭ દિવસ લંબાવવાની માંગ કરી હતી. મુખ્ય પ્રધાન કેજરીવાલ વતી વરિષ્ઠ વકીલ અભિષેક મનુ સિંઘવીએ ન્યાયમૂત જેકે મહેશ્ર્વરી અને કેવી વિશ્ર્વનાથનની વેકેશન બેન્ચ પાસેથી તાત્કાલિક સુનાવણીની વિનંતી કરી હતી.
સિંઘવી કેજરીવાલ વતી કોર્ટમાં હાજર થયા અને કહ્યું કે મેડિકલ ટેસ્ટ માટે વચગાળાની જામીનની મુદત ૭ દિવસ વધારવાની જરૂર છે. તેના પર જસ્ટિસ મહેશ્ર્વરીએ પૂછ્યું હતું કે ગયા અઠવાડિયે જ્યારે જસ્ટિસ દીપાંકર દત્તાની વેકેશન બેન્ચ બેઠી હતી ત્યારે તમે આ મામલો કેમ ન ઉઠાવ્યો. જસ્ટિસ દત્તા એ બેંચનો ભાગ હતા જેણે ચૂંટણી પ્રચાર માટે અરવિંદ કેજરીવાલને વચગાળાના જામીન આપ્યા હતા.
સિંઘવીનો જવાબ હતો કે ડૉક્ટરે તેમને ટેસ્ટ કરાવવા કહ્યું હતું. જસ્ટિસ મહેશ્ર્વરીએ કહ્યું કે અમે આમાં કંઈ કરી શક્તા નથી. તમે ચીફ જસ્ટિસ સમક્ષ મામલો રજૂ કરો. તે સુનાવણી માટે લિસ્ટિંગ અંગે નિર્ણય લેશે. સિંઘવીએ ફરીથી કહ્યું, તાકીદની જરૂર છે કારણ કે ૨૦ દિવસના વચગાળાના જામીનનો અંત આવી રહ્યો છે અને મેડિકલ ટેસ્ટ કરાવવો પણ ખૂબ જ જરૂરી છે. હું માત્ર ૭ દિવસ સુધી વચગાળાના જામીન વધારવાની માંગ કરી રહ્યો છું.