નવીદિલ્હી, સુપ્રીમ કોર્ટે ૧૭ વિદેશી નાગરિકોને તેમના દેશમાં પાછા મોકલવાનો આદેશ આપ્યો છે. કોર્ટે કેન્દ્ર સરકારને આસામના ડિટેન્શન કેમ્પમાં રાખવામાં આવેલા ૧૭ વિદેશી નાગરિકોને તાત્કાલિક પરત મોકલવા જણાવ્યું હતું. કેસની સુનાવણી દરમિયાન જસ્ટિસ એએસ ઓકાએ ટિપ્પણી કરી હતી કે આ લોકો પર જે સંસાધનો ખર્ચવામાં આવી રહ્યા છે તે ભારતના લોકોને આપવા જોઈએ. જસ્ટિસ અભય એસ. જસ્ટિસ ઓકા અને જસ્ટિસ ઉજ્જલ ભુઈયાની બેંચે કહ્યું કે આ ૧૭ લોકો વિરુદ્ધ ભારતમાં કોઈ કેસ નોંધાયેલ નથી. આવી સ્થિતિમાં તેમને પાછા મોકલવામાં કોઈ મુશ્કેલી નથી.
કોર્ટે કહ્યું, ‘રિપોર્ટ દર્શાવે છે કે આસામમાં એક ડિટેન્શન સેન્ટર છે, જેને ટ્રાન્ઝિટ કેમ્પ પણ કહેવામાં આવે છે. ડિટેન્શન સેન્ટરમાં ૧૭ વિદેશીઓ જાહેર કરવામાં આવ્યા છે, જેમાંથી ૪ બે વર્ષથી અહીં છે. અમારું માનવું છે કે કેન્દ્ર સરકારે તેમને પાછા મોકલવા માટે તાત્કાલિક પગલાં લેવા જોઈએ. આ લોકો સામે કોઈપણ ગુના હેઠળ કોઈ કેસ નોંધવામાં આવ્યો નથી. સૌથી પહેલા એ ૪ લોકોને પાછા મોકલવા જોઈએ જેઓ છેલ્લા ૨ વર્ષથી ડિટેન્શન સેન્ટરમાં છે. કોર્ટે કહ્યું કે આ મામલે શું કાર્યવાહી કરવામાં આવી તેનો રિપોર્ટ બે મહિનામાં રજૂ કરવામાં આવે.
હવે કોર્ટે આ કેસની આગામી સુનાવણી ૨૬મી જુલાઈએ કરવાનો નિર્ણય લીધો છે. આ નિર્ણય આસામમાં અટકાયત કેન્દ્રોની સ્થિતિને લઈને આપવામાં આવ્યો હતો. આસામના આ અટકાયત કેન્દ્રોમાં એવા લોકોને રાખવામાં આવ્યા છે જેમની નાગરિક્તા શંકાસ્પદ છે અથવા જેમને ટ્રિબ્યુનલ દ્વારા વિદેશી જાહેર કરવામાં આવ્યા છે. કેસની સુનાવણી દરમિયાન જસ્ટિસ ભુઈયાએ એ પણ પૂછ્યું કે વિદેશથી આવેલા લોકોને પાછા મોકલવાની પ્રક્રિયા શું છે. કોર્ટે કહ્યું, ‘એકવાર ટ્રિબ્યુનલ તેનું પરિણામ આપે કે આ લોકો વિદેશી છે, તો પછી આગળનું પગલું શું છે? શું આ અંગે પાડોશી દેશો સાથે તમારો કોઈ કરાર છે? જો તેમને પાછા મોકલવા પડશે, તો તે કેવી રીતે થશે? તમે તેને હંમેશા કેન્દ્રમાં રાખી શક્તા નથી.