શિમલા,
હિમાચલ પ્રદેશ વિધાનસભા ચૂંટણીમાં કોંગ્રેસને બહુમતી મળ્યા બાદ સુખવિંદર સિંહ સુક્ખુને મુખ્યમંત્રી બનાવવામાં આવ્યા છે.સુખવિંદર સિંહ સુક્ખુએ સીએમની ખુરશી પર બેસતાની સાથે જ આકરો સંદેશ આપ્યો છે. સીએમ સુક્ખુએ કહ્યું કે સરકારી કચેરીઓમાં વિલંબ અને ભ્રષ્ટાચાર સહન કરવામાં આવશે નહીં. આ ઉપરાંત તેમણે વહેલી તકે પારદશતા ધારાનો અમલ કરવાની ખાતરી પણ આપી હતી.
સુખવિંદર સિંહ સુક્ખુએ આજે (૧૨ ડિસેમ્બર) હિમાચલ પ્રદેશના નવા મુખ્યમંત્રી તરીકે સત્તાવાર રીતે ચાર્જ સંભાળ્યો. સીએમ સુક્ખુ તેમની ઓફિસે પહોંચ્યા અને કહ્યું કે આજે તેઓ મુખ્યમંત્રીનો કાર્યભાર સંભાળી રહ્યા છે. તમામ ધારાસભ્યો, ડેપ્યુટી સીએમ અને પાર્ટીના તમામ વરિષ્ઠ નેતાઓ રાજ્યના વિકાસ માટે સાથે મળીને કામ કરશે. સીએમએ કહ્યું કે જ્યાં સુધી કેબિનેટની વાત છે, કોંગ્રેસ હાઈકમાન્ડ સાથે ચર્ચા કર્યા પછી ટૂંક સમયમાં તેની જાહેરાત કરવામાં આવશે.
હિમાચલ પ્રદેશના મુખ્યમંત્રી સુખવિંદર સિંહ સુક્ખુએ કહ્યું કે સરકારી કચેરીઓમાં વિલંબ અને ભ્રષ્ટાચાર સહન કરવામાં આવશે નહીં. આ ઉપરાંત તમામ સરકારી યોજનાઓ અને કામો સમયસર પૂર્ણ થઈ શકે તે માટે સરકારી કામ વહેલામાં વહેલી તકે નિપટાવવા માટે પારદશતા ધારો અમલમાં મૂકવામાં આવશે. આ સિવાય સીએમ સુક્ખુએ કહ્યું કે, પહેલી કેબિનેટ બેઠકમાં જૂની પેન્શન યોજના લાગુ કરવામાં આવશે. તેમણે કહ્યું કે તેમની પાર્ટીએ ૧૦ ગેરંટી આપી છે અને સરકાર તેનો અમલ કરશે. સીએમએ કહ્યું, અમે પારદર્શક અને પ્રામાણિક સરકાર ચલાવીશું. પ્રથમ કેબિનેટ બેઠકમાં ઓપીએસ(જૂની પેન્શન યોજના) લાગુ કરવામાં આવશે.