નવીદિલ્હી, સલમાન ખાન ફાયરિંગ કેસમાં એક ચોંકાવનારો ખુલાસો સામે આવ્યો છે. શૂટર્સને સલમાન ખાનના ઘર પર ૧૦ રાઉન્ડ ફાયરિંગ કરવાનો આદેશ આપવામાં આવ્યો હતો. અનમોલ વિશ્ર્નોઈએ બંને શૂટરોને ૧૦ રાઉન્ડ ફાયર કરવાનો આદેશ આપ્યો હતો. બંને શૂટર્સ ૧૦ રાઉન્ડ ફાયરિંગ કરવાના ઇરાદે એક નહીં, પરંતુ બે બંદૂકો સાથે સલમાન ખાનના ઘરની બહાર પહોંચ્યા હતા. એક બંદૂક સાગર પાલ પાસે હતી, જ્યારે બીજી વિકી ગુપ્તા પાસે હતી.
ફાયરિંગની ઘટનાને અંજામ આપ્યા બાદ શૂટરોએ બંને બંદૂકોને સુરતની તાપ્તી નદીમાં ફેંકી દીધી હતી. મુંબઈ ક્રાઈમ બ્રાન્ચ હવે ખાનગી મરીન મારફત સુરતની તાપ્તી નદીમાં બંને બંદૂકોને શોધી રહી છે. તપાસ દરમિયાન જાણવા મળ્યું કે બંને શૂટરોને બંદૂક વિશ્ર્નોઈ ગેંગના લોકોએ આપી હતી, પરંતુ હજુ સુધી તેમની ઓળખ થઈ નથી. શૂટર હોળી દરમિયાન બંદૂક લઈને બિહાર ગયો હતો. ત્યાં, બંને શૂટરોએ એક જ બંદૂકથી ફાયરિંગની પ્રેક્ટિસ કરી અને હોળી પછી મુંબઈ પાછા ફર્યા હતા.
સલમાન ખાનના ઘરે ગોળીબાર કર્યા બાદ શૂટર વિકી ગુપ્તા તેના નાના ભાઈ સોનુ ગુપ્તાના સંપર્કમાં હતો અને તેની સાથે લાંબા સમય સુધી વાત કરતો હતો. તેના આધારે ક્રાઈમ બ્રાન્ચ હજુ પણ સોનુ ગુપ્તાની સતત પૂછપરછ કરી રહી છે. ક્રાઈમ બ્રાન્ચના સૂત્રોના જણાવ્યા અનુસાર, બંને શૂટર સલમાન ખાનના ઘરે ગોળીબાર કરવાના હતા, પરંતુ પકડાઈ જવાના ડરને કારણે માત્ર એક જ શૂટર ગોળીબાર કરી શક્યો હતો. મોટાભાગના પુરાવા એકત્ર કરી લેવામાં આવ્યા છે અને ટૂંક સમયમાં જ ક્રાઈમ બ્રાન્ચ લોરેન્સ વિશ્ર્નોઈની કસ્ટડી માટે કોર્ટમાં જશે.
મુંબઈ ક્રાઈમ બ્રાન્ચ આ કેસમાં વધુ કેટલીક કલમો ઉમેરી શકે છે. આ કેસમાં મુંબઈ ક્રાઈમ બ્રાન્ચે અત્યાર સુધીમાં ૧૦ લોકોના નિવેદન નોંયા છે. બે શૂટરો કોની કારમાં દહિસરથી સુરત ભાગી ગયા હતા તે કાર ચાલકનું નિવેદન હજુ નોંધવાનું બાકી છે.