નવીદિલ્હી, શિક્ષણ વિભાગના અધિક મુખ્ય સચિવ કે કે પાઠકને લઈને બુધવારે સતત બીજા દિવસે બિહાર વિધાનસભામાં હંગામો થયો હતો. કે.કે.પાઠકને હોદ્દા પરથી હટાવવાની માગણી સાથે વિપક્ષના સભ્યોએ હંગામો મચાવ્યો હતો. આરજેડી સહિત અન્ય વિપક્ષી પાર્ટીઓના નેતાઓએ નીતિશ કુમાર વિરુદ્ધ સૂત્રોચ્ચાર શરૂ કર્યા. જેના પર મુખ્યમંત્રી ગુસ્સે થઈ ગયા. તેઓ પોતાની સીટ પરથી ઉભા થયા અને કે.કે.પાઠકને ઈમાનદાર અધિકારી ગણાવતા વિપક્ષ પર નિશાન સાધ્યું. તેમને કે.કે.પાઠકનો બચાવ કર્યો અને તેમને પ્રમાણિક અધિકારી ગણાવ્યા. નીતિશે કહ્યું કે શાળામાં વર્ગો સવારે ૧૦ વાગ્યાથી શરૂ થશે, પરંતુ શિક્ષકોએ ૧૫ મિનિટ પહેલા શાળાએ પહોંચવું પડશે.
હકીક્તમાં, મુખ્યમંત્રી નીતિશ કુમારે મંગળવારે ગૃહની અંદર જાહેરાત કરી હતી કે શાળાનો સમય ૯ થી ૫ ના બદલે ૧૦ થી ૪ વાગ્યા સુધી બદલાશે. આ પછી ACS કે.કે.પાઠકે આદેશ આપ્યો હતો કે ભલે વર્ગો ૧૦ થી ૪ વચ્ચે ચાલશે. પરંતુ શિક્ષકોએ સવારે ૯ થી સાંજના ૫ વાગ્યા સુધી શાળામાં રહેવું પડશે. શારીરિક હાજરી ૯ થી ૧૦ ની વચ્ચે રહેશે, મિશન દક્ષ વર્ગો સાંજે છેલ્લા એક કલાકમાં લેવામાં આવશે. આ આદેશ બાદ બાળકો, વાલીઓ તેમજ શિક્ષકોમાં અસમંજસની સ્થિતિ સર્જાઈ હતી. પૂર્વ શિક્ષણ મંત્રી ચંદ્રશેખરે કહ્યું કે શિક્ષણ વિભાગના અધિક મુખ્ય સચિવ કે કે પાઠક સીએમ નીતિશના આદેશનું પાલન કરતા નથી. તેમણે કહ્યું કે મુખ્યમંત્રીના આદેશ મુજબ રાજ્યમાં શાળાઓના સમયમાં કોઈ ફેરફાર કરવામાં આવ્યો નથી. વિધાનસભા સત્રની શરૂઆત પહેલા મીડિયા સાથે વાત કરતા તેમણે આ નિવેદન આપ્યું હતું.કે.કે.પાઠકના નવા આદેશને લઈને બુધવારે વિધાનસભાની કાર્યવાહી શરૂ થતાં જ હોબાળો થયો હતો. વિપક્ષના સભ્યોએ સરકાર વિરુદ્ધ સૂત્રોચ્ચાર શરૂ કર્યા હતા. આ પછી સીએમ નીતિશે કહ્યું કે શાળાઓમાં બાળકોનું શિક્ષણ સવારે ૧૦ વાગ્યાથી શરૂ થશે. પરંતુ શિક્ષકોએ ૧૫ મિનિટ વહેલા શાળાએ આવવાનું રહેશે. બાળકો શાળાએ આવે તેના ૧૫ મિનિટ પહેલા શિક્ષકો આવશે અને તેમના ગયાની ૧૫ મિનિટ પછી શાળા છોડી દેશે.
નીતિશ કુમારે એસીએસ કેકે પાઠકને ઈમાનદાર અધિકારી ગણાવ્યા. જ્યારે વિપક્ષના ધારાસભ્યોએ પાઠકને પદ પરથી હટાવવાની માંગ કરી ત્યારે મુખ્યમંત્રી ગુસ્સે થઈ ગયા. તેમણે કહ્યું કે વિપક્ષને ઈમાનદાર અધિકારીને હટાવવાની માંગ કરવાનો કોઈ અધિકાર નથી. આ માંગ તદ્દન ખોટી છે. તે એવા અધિકારી છે જે અહીં-તહીં ધંધો કરતા નથી. વિપક્ષના ધારાસભ્યોએ ગૃહમાં મુખ્યમંત્રી નીતિશ કુમાર વિરુદ્ધ સૂત્રોચ્ચાર કરતાં વાતાવરણ ગરમાયું હતું. નીતિશે વિપક્ષી સભ્યોને કહ્યું કે તમે અમને મારી રહ્યા છો, અમે તમને જીવતા રાખીશું. તમે જીવતા રહો, અમને મારતા રહો. તમે અમને જેટલા મારશો તેટલો જ તમારો નાશ થશે. તેમણે કહ્યું કે આગામી ચૂંટણીમાં તમે લોકો બહુ ઓછી સંખ્યામાં ગૃહમાં આવશો અને એક પણ બેઠક નહીં મળે. જો નારા લગાવવા હોય તો ઘરમાં જ રહો, અહીં આવવાની જરૂર નથી.
શિક્ષણ પ્રધાન વિજય ચૌધરીએ કહ્યું કે શિક્ષક સંગઠન અને વિવિધ પક્ષોના નેતાઓએ ગૃહની બહાર કહ્યું હતું કે શાળાનો સમય બદલવો જોઈએ. મુખ્યમંત્રી નીતિશ કુમારે ગઈકાલે જ જાહેરાત કરી હતી કે શાળાના સમયમાં ફેરફાર કરવામાં આવશે. સવારે ૯ થી સાંજના ૫ વાગ્યા સુધીનો શાળાનો સમય ૧૦ થી ૪ વાગ્યા સુધી બદલવો જોઈએ. શિક્ષણ વિભાગ દ્વારા જારી કરાયેલા પત્રમાં કોઈને કોઈ મૂંઝવણ હોય તો મુખ્યમંત્રીએ ગૃહમાં સ્થિતિ સ્પષ્ટ કરી છે. વર્ગો સવારે ૧૦ થી સાંજના ૪ વાગ્યા સુધી ચાલશે તેમ છતાં શિક્ષકોએ ૧૫ મિનિટ વહેલા શાળાએ પહોંચવું પડશે. સરકાર જે પણ નિર્ણય લેશે તેનો અમલ કરવામાં આવશે.