- એશિયન ગેમ્સ માટે પસંદ કરાયેલી ભારતીય ટીમમાં ૠતુરાજ ગાયકવાડને કેપ્ટન બનાવવામાં આવ્યો.
મુંબઇ, એશિયન ગેમ્સ માટે ભારતીય પુરુષ ટીમની જાહેરાત કરવામાં આવી છે. તમને જણાવી દઈએ કે એશિયન ગેમ્સમાં ક્રિકેટ ટૂર્નામેન્ટ ૧૯ થી ૨૮ સપ્ટેમ્બર સુધી રમાશે. આવી સ્થિતિમાં બીસીસીઆઇએ એવા ખેલાડીઓની પસંદગી કરી છે જેઓ વર્લ્ડ કપ ટીમનો ભાગ નહીં હોય. એશિયન ગેમ્સ માટે બીસીસીઆઈ દ્વારા પસંદ કરાયેલા ખેલાડીઓમાં શિખર ધવનનું નામ નથી, જે ચાહકોને આશ્ર્ચર્યમાં મૂકે છે. વાસ્તવમાં એવી ધારણા હતી કે ધવનને ભારતીય બી ટીમની કપ્તાની સોંપવામાં આવશે પરંતુ તેમ થયું નથી. એશિયન ગેમ્સ માટે પસંદ કરાયેલી ભારતીય ટીમમાં ૠતુરાજ ગાયકવાડને કેપ્ટન બનાવવામાં આવ્યો છે.
એશિયન ગેમ્સ માટે ટીમની પસંદગી કરતા પહેલા, બીસીસીઆઈએ પહેલેથી જ કહ્યું હતું કે સમયપત્રકના ઓવરલેપને કારણે, એવા ખેલાડીઓની પસંદગી કરવામાં આવશે જે લગભગ ક્યારેય વર્લ્ડ કપ ટીમનો ભાગ નહીં હોય. આવી સ્થિતિમાં એશિયન ગેમ્સની ટીમમાં ધવનની પસંદગી ન થવી એ સંકેત છે કે વર્લ્ડ કપ ટીમ માટે પણ તેના નામ પર વિચાર કરવામાં આવી શકે છે. જો કે, આવું થવાની શક્યતા નથી. કારણ કે ટીમ ઈન્ડિયામાં શુભમન ગિલ અને જયસ્વાલ જેવા ઓપનર બેટ્સમેન છે જે રોહિત સાથે ઓપનિંગ કરવા માટે તૈયાર છે. વૈકલ્પિક ઓપનર તરીકે જયસ્વાલને વનડે ટીમમાં સામેલ કરી શકાય છે.
એશિયન ગેમ્સ માટે ટીમ ઈન્ડિયામાં ધવનનો સમાવેશ ન કરીને બીસીસીઆઈએ દિગ્ગજ ક્રિકેટરની કારકિર્દીને લઈને મોટો ઈશારો કર્યો છે. એટલે કે, હવે ધવન માત્ર ’ઈન્ડિયા એ ટીમ’ માટે જ નહીં પરંતુ ’બી ટીમ’ માટે પણ ટીમ મેનેજમેન્ટની વ્યૂહરચનાનો ભાગ છે. ભારતનો ગબ્બર હાલમાં ભારતીય ટીમના ત્રણેય ફોર્મેટમાંથી બહાર છે. ધવને છેલ્લે સપ્ટેમ્બર ૨૦૧૮માં ભારત માટે ટેસ્ટ મેચ રમી હતી અને ડિસેમ્બર ૨૦૨૨માં વનડે રમી હતી. આ સિવાય તે છેલ્લે જુલાઈ ૨૦૨૧માં T20 ઇન્ટરનેશનલ માં રમ્યો હતો.
ધવને ભારત માટે અત્યાર સુધીમાં ૩૪ ટેસ્ટ મેચ રમી છે, જેમાં તેણે ૨૩૧૫ રન બનાવ્યા છે, જ્યારે તેણે વનડેમાં ૧૬૭ મેચ રમી છે. ધવનના વનડેમાં ૬૭૯૩ રન છે. તે જ સમયે, ટી ૨૦ ઇન્ટરનેશનલમાં, ધવને તેની કારકિર્દીમાં અત્યાર સુધી ૬૮ મેચ રમી છે અને કુલ ૧૭૫૯ રન બનાવ્યા છે. ધવનના નામે ટેસ્ટમાં ૭ સદી અને ૫ અડધી સદી સામેલ છે. વનડેમાં ધવને ૧૭ સદી અને ૩૯ અડધી સદી ફટકારી છે. આ સિવાય ધવનના નામે ટી૨૦માં ૧૧ અડધી સદી છે.
સોશિયલ મીડિયા પર ચાહકો સતત ધવનને ટીમમાં પસંદ ન કરવા પર ટિપ્પણી કરી રહ્યા છે. ચાહકો બીસીસીઆઈથી નારાજ છે. ચાહકોનું માનવું છે કે ધવન હજુ પણ ભારતનો સર્વશ્રેષ્ઠ બેટ્સમેન છે અને તે ઓછામાં ઓછો એશિયન ગેમ્સ માટે પસંદ કરાયેલી ભારતીય ટીમમાં હોવો જોઈએ. તમને જણાવી દઈએ કે ક્રિકેટ છેલ્લે ૨૦૧૪માં એશિયન ગેમ્સમાં રમાઈ હતી જ્યારે ભારતે ભાગ લીધો ન હતો.