નવીદિલ્હી,અહેવાલ છે કે શાહરૂખ ખાનની આગામી ફિલ્મ ’જવાન’ની કેટલીક ક્લિપ્સ મેર્ક્સ પાસેથી ચોરી કરીને ઓનલાઈન લીક થઈ ગઈ છે. ફિલ્મનું નિર્માણ કરતી કંપની રેડ ચિલીઝ એન્ટરટેઈનમેન્ટે ૧૦ ઓગસ્ટે સાંતાક્રુઝ પોલીસ સ્ટેશનમાં આ મામલે FIR નોંધાવી છે. તેના કોપીરાઈટનું ઉલ્લંઘન થયું હોવાનો દાવો કરવામાં આવ્યો હતો. ફ્રી પ્રેસ જર્નલના અહેવાલ મુજબ શાહરૂખની કંપની રેડ ચિલીઝ દ્વારા ૧૦ ઓગસ્ટે મુંબઈના સાંતાક્રુઝ પોલીસ સ્ટેશનમાં ઈન્ફોર્મેશન ટેક્નોલોજી એક્ટ હેઠળ એફઆઈઆર દાખલ કરવામાં આવી છે. રિપોર્ટમાં જણાવાયું છે કે નિર્માતાઓએ પાંચ ટ્વિટર હેન્ડલની ઓળખ કરી છે જેમણે જવાનની લીક થયેલી ક્લિપ્સ શેર કરી હતી અને તેમને કાનૂની નોટિસ પણ મોકલી છે. કહેવામાં આવી રહ્યું છે કે એક હેન્ડલે નોટિસ સ્વીકારી લીધી છે.
આ ત્રીજી વખત છે જ્યારે ’જવાન’ની કોઈ ક્લિપ અથવા સ્ટિલ ઓનલાઈન લીક થઈ છે. થોડા મહિના પહેલા, આ ફિલ્મમાં શાહરૂખ ખાનની ફાઇટની સ્લો-મોશન એક્શન સિક્વન્સ સોશિયલ મીડિયા પર લીક થઈ હતી. તે સમયે રેડ ચિલીઝે ક્લિપ્સ હટાવવા માટે કોર્ટનો દરવાજો ખખડાવ્યો હતો.
કોર્ટે કહ્યું કે “તે રેડ ચિલીઝનો મામલો છે કે આ લીક થયેલી વિડિયો ક્લિપ્સ તેમના કોપીરાઈટ/બૌદ્ધિક સંપદા અધિકારોના ઉલ્લંઘન સિવાય કંઈ નથી. જેના કારણે તેમને નુક્સાન થઈ રહ્યું છે. લીક થયેલી વિડિયો ક્લિપ્સ એક સાથે કલાકારોના લૂક તેમજ ફિલ્મના સંગીતને જાહેર કરી રહી છે. બાદમાં આ ફિલ્મમાંથી શાહરૂખ ખાનના બાલ્ડ લુકની કેટલીક તસવીરો અને વીડિયો પણ લીક થયા હતા. આખરે ફિલ્મના પ્રિવ્યૂમાં શાહરૂખના લૂકની વિગતો સામે આવી છે. નયનતારા અને વિજય સેતુપતિ ઉપરાંત, દીપિકા પાદુકોણ પણ તમિલ ફિલ્મ નિર્માતા એટલી દ્વારા નિર્દેશિત જવાનમાં ખાસ ભૂમિકામાં છે. આ ફિલ્મમાં થલપથી વિજયનો કેમિયો પણ સામેલ છે, જેમણે અગાઉ એટલી સાથે ત્રણ ફિલ્મો બનાવી છે. જવાન ૭ સપ્ટેમ્બરે સમગ્ર ભારતમાં રિલીઝ થશે.