શહેરા,શહેરાના ડેમલી ગામ પાસેથી વન વિભાગે પાસ પરમિટ વગર લાકડા ભરીને જતી ટ્રકને ઝડપી પાડી હતી. વન વિભાગએ લાકડા અને ટ્રક મળીને અંદાજીત 4 લાખ રૂપિયાનો મુદ્દામાલ કબ્જે લીધો હતો.
શહેરાના ટીંબા પાટીયા થી છકડીયા તરફ જવાના માર્ગ ઉપર ડેમલી ગામ પાસે વન વિભાગના આર.એફ.ઓ. રોહિત પટેલને મળેલી માહિતીના આધારે સ્ટાફના જે.વી.પુવાર, જી. ટી. પરમાર સહિતના સ્ટાફે વોચ ગોઠવી હતી. ડેમલી ગામના રસ્તા પર બાતમીના વર્ણન વાળી ટ્રક આવતા વન વિભાગના સ્ટાફ એ ઉભી રખાવીને ચાલક પાસે પાસ પરમિટ માંગતા મળી આવેલ ન હતી. જેથી લાકડા ભરેલ ટ્રકને વન વિભાગની કચેરી ખાતે લાવીને આર.એફ.ઓ. રોહિત પટેલ દ્વારા કાયદેસરની કાર્યવાહી હાથધરીને અંદાજીત રૂપિયા 4 લાખનો મુદ્દામાલ કબ્જે લઈ વધુ તપાસના ચક્રોગતિમાન કર્યા હતા. જોકે, તાલુકા વન વિભાગ દ્વારા પાછલા એક મહિનામાં પાંચ કરતાં વધુ લાકડા ભરેલ ટ્રક ઝડપી પાડીને કડક કાર્યવાહી કરવામાં આવતા લાકડા ચોરોમાં છુપો ફફડાટ ફેલાયો હતો.