ગોધરા, સમગ્ર પંચમહાલ જિલ્લામાં ચકચાર જગાવનાર ન્યાયપાલિકા સાથે છેપરપિંડી આચરનાર બે આરોપીની નિયમિત જામીન અરજી ગોધરા સેશન્સ કોર્ટે નામંજુર કરી છે.
વર્ષ-2021ની સાલમાં ધી બોરડી દુધ ઉત્પાદક મંડળીમાં લાખો રૂપિયાની ઉચાપત કરનાર સેજલબેન દિલીપભાઈ પટેલ વિરુદ્ધ શહેરા પોલીસ સ્ટેશનમાં ગુનો નોંધાયેલ હતો. જે ફરિયાદમાં પોલીસ દ્વારા આરોપી સેજલબેન દિલીપભાઈ પટેલની ધરપકડ કરતા તેમને તેમના પતિ દિલીપભાઈ કાંતિભાઈ પટેલ તથા અન્ય આરોપીઓ સાથેના મેળાપીપણામાં જે તે સમયે જામીન મુકત થવા માટે થઈને શહેરાના જયુડિ.મેજી.ની કોર્ટમાં રૂ.7,51,751નો બનાવટી ડિમાન્ડ ડ્રાફટ એકસીસ બેંકનો બનાવી પોતાના એડવોકેટ મારફતે કોર્ટમાં આ બનાવટી ડિમાન્ટ ડ્રાફટ રજુ કર્યો હતો. તેના આધારે જામીન મુકત થયેલા અને ત્યારબાદ કેસ ચાલવા ઉપર આવતા આ તમામ આરોપીઓએ ભેગા મળીને કોર્ટમાં તમામ અધિકારીઓને અંધારામાં રાખીને ડુપ્લિકેટ ફરિયાદી રજુ કરીને અને બોરડી દુધ ઉત્પાદક સહકારી મંડળીના બનાવટી લેટરપેડ તૈયાર કરી તેની ઉપર મંડળીના ચેરમેન/સેક્રેટરીના બનાવટી સહી-સિકકા કરી કોર્ટમાં રજુ કરીને શહેરા ખાતેના ફોજદારી કેસમાં નિર્દોષ છુટી ગયા હતા. આ બાબતની જાણ બોરડી દુધ ઉત્પાદક સહકારી મંડળીના નાણાં ઓડિટ રિપોર્ટમાં પણ બાકી પડતા તેઓ દ્વારા આ તમામ બાબતો અંગે વિગતવારની અરજીઓ ગુજરાત હાઈકોર્ટ અને અન્ય અધિકારીઓ સમક્ષ કરતા આ બાબતે શહેરા પોલીસ સ્ટેશન ખાતે આરોપીઓ સામે ગુનો નોંધાતા તપાસ કરનાર અધિકારી દ્વારા વિગતવારની તપાસ કરી આરોપીઓની અટક કરી હતી. જેમાં આરોપી દ્વારા પંચમહાલ જિલ્લાના પ્રિન્સિપાલ ડિસ્ટ્રિકટ અને સેશન્સ જજ પી.વી.શ્રીવાસ્તવની કોર્ટમાં નિયમિત જામીન અરજી કરતા જામીન અરજીની સુનાવણી થતાં જિલ્લા સરકારી વકીલ રાકેશ એસ.ઠાકોરની વિગતવારની દલીલો તથા કેસના સંજોગો તથા પોલીસ તપાસના કાગળોને ઘ્યાને લઈ નામદાર કોર્ટ દ્વારા ન્યાય પાલિકા સાથે છેતરપિંડી કરનાર આરોપી દિલીપભાઈ કાંતિભાઈ પટેલ તથા આરોપી હિરાભાઈ રયજીભાઈ પટેલની નિયમિત જામીન અરજી નામંજુર કરી છે. આ જામીન અરજી નામંજુર થતાં સમગ્ર પંચમહાલ જિલ્લાના ન્યાયતંત્રમાં ચકચાર મચી જવા પામ્યો છે.આ પ્રકરણમાં ધણા બધા બીજા આરોપીઓની પણ સંડોવણી જણાઈ આવેલ છે. જેઓની પણ અટક કરવાની કાર્યવાહી કરવામાં આવશે તેવુ તપાસ કરનાર શહેરાના ઈન્સ્પેકટર દ્વારા જણાવવામાં આવ્યુ છે.