શહેરા,શહેરા-ગોધરા હાઇવે માર્ગ ઉપર આવેલ રેડ એપલ હોટલ પાસે અલ્ટો કારને અકસ્માત નડ્યો હતો,જેમાં કાર ચાલકને નજીવી ઈજાઓ પહોંચતા સારવાર અર્થે ખસેડાયો હતો.
પંચમહાલ જિલ્લાના શહેરા-ગોધરા હાઇવે માર્ગ ઉપર આવેલ રેડ એપલ હોટલ પાસે વડોદરા જઈ રહેલા કાર ચાલકને અકસ્માત નડ્યો હતો. જેની વાત કરીએ તો અલ્ટો કાર નંબર જીજે.35.એન.0809 નો ચાલક લેબોરેટરીના કામ અર્થે લુણાવાડા થી વડોદરા તરફ જઈ રહ્યો હતો. તે સમય દરમિયાન શહેરા-ગોધરા હાઇવે પર આવેલ રેડ એપલ હોટલ પાસે સામેના રોડ પરથી પસાર થતાં વાહનના લાઈટ થી અંજવાઈ જતા અલ્ટો કારના ચાલકે સ્ટેરીંગ પરનો કાબુ ગુમાવતા અલ્ટો કાર સામેના રોડ તરફ જતી રહી હતી. જેને લઈને અલ્ટો કારના ચાલકને નજીવી ઈજાઓ પહોંચતા આસપાસના સ્થાનિક લોકો તેમજ વાહન ચાલકોએ 108 એમ્બ્યુલન્સને જાણ કરતા 108 એમ્બ્યુલન્સે તાત્કાલિક ઘટના સ્થળે પહોંચી ઈજાગ્રસ્ત કાર ચાલકને સારવાર અર્થે શહેરા રેફરલ હોસ્પિટલમાં ખસેડવામાં આવ્યો હતો. જોકે, આ અકસ્માતની ઘટનામાં અલ્ટો કારને નુકશાન પહોંચ્યું હતું. અકસ્માતની જાણ થતાં શહેરા પોલીસ પણ ઘટનાસ્થળે પહોંચી હતી.