તેલઅવીવ, ઈઝરાયેલમાં પસાર કરવામાં આવેલા ન્યાયિક સુધારણા બિલ સામે દેશભરમાં પ્રદર્શન ચાલુ છે. નવા કાયદાકીય ફેરફાર હેઠળ હવે ઈઝરાયેલમાં સુપ્રીમ કોર્ટ સરકારના કોઈપણ નિર્ણયને ખોટો ગણાવીને નકારી શકશે નહીં. ઈઝરાયલ બાર એસોસિયેશને તેમની વિરુદ્ધ મંગળવારે હાઇકોર્ટ ઓફ જસ્ટિસમાં અરજી દાખલ કરી છે.ઈઝરાયેલના ડૉક્ટરોના મેડિકલ એસોસિયેશને બિલના વિરોધમાં ૨૪ કલાકની હડતાળની જાહેરાત કરી હતી. જેરુસલેમ પોસ્ટ અનુસાર, તેમની હડતાલ પર લેબર કોર્ટે રોક લગાવી દીધી હતી, ત્યારબાદ ડોક્ટરો કામ પર પાછા ફર્યા હતા.
બીજી બાજુ, ક્રેડિટ રેટિંગ એજન્સી મોર્ગન સ્ટેનલીએ વિરોધ વચ્ચે ઈઝરાયેલનું ક્રેડિટ રેટિંગ ડાઉનગ્રેડ કર્યું છે. તે જ સમયે, યુરોપિયન યુનિયન અને બ્રિટને કહ્યું છે કે ઈઝરાયેલમાં ન્યાયતંત્રની સ્વતંત્રતા સુરક્ષિત હોવી જોઈએ. અમેરિકાએ કહ્યું છે કે લોકશાહીમાં મોટા ફેરફારો માટે વ્યાપક સર્વસંમતિ હોવી જોઈએ. પ્રદર્શનકારીઓએ અખબારોમાં કાળા પાનાની સંપૂર્ણ જાહેરાતો આપી હતી. તેમાં લખવામાં આવ્યું હતું કે ઈઝરાયેલની લોકશાહી માટે આ કાળો દિવસ છે.
ઈઝરાયેલમાં ૨૯ અઠવાડિયાથી ચાલી રહેલા વિરોધ છતાં, સોમવારે જ્યુડિશિયલ ઓવરહોલ બિલનો મોટો ભાગ પસાર કરવામાં આવ્યો હતો. બિલ પર મતદાન દરમિયાન હજારો ઈઝરાયલીઓએ તેલ અવીવની શેરીઓમાં પ્રદર્શન કરવાનું ચાલુ રાખ્યું. તેમણે કહ્યું કે બેન્જામિન નેતન્યાહુ હવે રશિયન રાષ્ટ્રપતિ પુતિન જેવા બની ગયા છે. તેઓ દેશને સરમુખત્યારશાહી તરફ ધકેલી રહ્યા છે.
કાયદાકીય પરિવર્તનનો વિરોધ કરી રહેલા લોકોએ લોકશાહી કે બળવોના નારા લગાવ્યા. તેમણે કહ્યું કે ઈઝરાયેલમાં સરમુખત્યારશાહી નહીં ચાલે. આ દરમિયાન અનેક પત્રકારો પર પણ હુમલો કરવામાં આવ્યો હતો. દેખાવકારોએ મુખ્ય બેગુઈન હાઈવે બ્લોક કરી દીધો હતો. નેતન્યાહુની સરમુખત્યારશાહીનો વિરોધ કરવા માટે કેટલાક વિરોધીઓ ઉત્તર કોરિયાનો ધ્વજ લઈને જતા જોવા મળ્યા હતા. પોલીસે વોટર કેનનનો ઉપયોગ કર્યો હતો.
સોમવારે બિલ પર વોટિંગ દરમિયાન વિપક્ષના તમામ ૫૬ સભ્યોએ તેનો બહિષ્કાર કર્યો હતો. ત્યારબાદ બિલ ૬૪-૦ મતથી પસાર થયું. ઈઝરાયેલના રાષ્ટ્રીય વિરોધ આંદોલને દેશની એક્તામાં ભંગાણ, સૈન્ય અને અર્થવ્યવસ્થાના પતન માટે નેતન્યાહુને જવાબદાર ઠેરવ્યા હતા.
નેશનલ પ્રોટેસ્ટે કહ્યું કે આવા નેતા સાથે વાત કરવાનો કોઈ અર્થ નથી કે જેણે પોતાને રશિયન રાષ્ટ્રપતિ પુતિન જેવો બનાવ્યો છે અને દેશને સરમુખત્યારશાહી તરફ ધકેલવાનો નિર્ણય લીધો છે. અમે નેતન્યાહુ સામે અંત સુધી લડીશું જેથી ઇઝરાયેલ ઉદાર લોકશાહી બની રહે.
વડાપ્રધાન નેતન્યાહુએ કહ્યું- મતભેદો હોવા છતાં દેશે સાથે રહેવું પડશે. વિવિધ સરકારી વિભાગો વચ્ચે સંતુલન બનાવવા અને તેને ચલાવવા માટે બિલ ખૂબ જ મહત્વપૂર્ણ છે. અમે હજુ પણ બિલ પર વાતચીત માટે તૈયાર છીએ. અમે અગાઉ પણ પ્રયાસ કર્યો હતો, પરંતુ વિપક્ષી નેતાઓએ તે થવા દીધું ન હતું. ઈઝરાયેલ એક મજબૂત લોકશાહી દેશ છે અને આ હકીક્તને કોઈ બદલી શકે તેમ નથી. અમે હંમેશા સાથે રહીશું. પરસ્પર મતભેદોને કારણે દેશ દુશ્મનો સામે ક્યારેય નબળો નહીં પડે.