ઢાકા, બાંગ્લાદેશમાં, વડા પ્રધાન શેખ હસીનાના રાજીનામાની માંગ પર અડગ રહેલા દેખાવકારોની પોલીસ સાથે ઘર્ષણમાં બે લોકો માર્યા ગયા અને ડઝનેક ઘાયલ થયા. ત્રણ દિવસ સુધી પરિવહન બંધ રાખવાની જાહેરાતના પહેલા જ દિવસે દેશમાં હસીના વિરુદ્ધ જોરદાર પ્રદર્શનો થયા હતા. દરમિયાન, સરકારે દેશભરમાં અર્ધલશ્કરી દળોને તૈનાત કરીને સુરક્ષા વ્યવસ્થા વધારવાના આદેશો જારી કર્યા છે.
મુખ્ય વિપક્ષી બાંગ્લાદેશ નેશનાલિસ્ટ પાર્ટીએ સમર્થકો અને પોલીસ વચ્ચેની અથડામણના જવાબમાં ત્રણ દિવસના રોડ બ્લોકનું આહ્વાન કર્યું હતું. બીએનપી માંગ કરે છે કે પીએમ શેખ હસીના જાન્યુઆરીમાં સામાન્ય ચૂંટણી પહેલા રાજીનામું આપે અને તટસ્થ રખેવાળ સરકારની દેખરેખ હેઠળ ચૂંટણી કરાવવાની મંજૂરી આપે.
સરકારે તેમની માંગને ફગાવી દીધી છે. કિશોરગંજના મધ્ય જિલ્લામાં મંગળવારે થયેલી અથડામણમાં બે વિરોધીઓ માર્યા ગયા હતા અને ૧૫ પોલીસકર્મીઓ સહિત ડઝનેક લોકો ઘાયલ થયા હતા. પોલીસના જણાવ્યા અનુસાર પરિસ્થિતિને કાબૂમાં લેવા માટે રબરની ગોળીઓ ચલાવવી પડી હતી.
આ દરમિયાન બાંગ્લાદેશના વડાપ્રધાન શેખ હસીનાએ બીએનપીને ’આતંકવાદી પાર્ટી’ ગણાવી છે. તેમણે બાંગ્લાદેશ રાષ્ટ્રવાદીઓ દ્વારા કરવામાં આવેલી તાજેતરની આતંકવાદી ગતિવિધિઓની નિંદા કરી અને કહ્યું કે બીએનપીએ ૨૮ ઓક્ટોબરે હિંસાનો આશરો લઈને ફરી એકવાર સાબિત કર્યું છે કે તે એક આતંકવાદી પાર્ટી છે.