સંજેલી બજારમાં અજાણ્યા ઈસમોએ ભ્રુણના ટુકડા કરી થેલીમાં ભરી ફેંકી જતા પંથકમાં ખડભડાટ
દાહોદ,
દાહોદ જિલ્લાના સંજેલી નગરમાં કોઈ અજાણ્યા ઈસમો દ્વારા ભર બજારે એક થેલીમાં ભ્રૃણના ટુકડા સાથે થેલીમાં ભરી ફેંકી જઈ અજાણ્યા ઈસમો ફરાર થઈ જતાં પંથકમાં ખળભળાટ સાથે ચકચાર મચી જવા પામ્યો છે. ઘટનાને પગલે સ્થાનીક પોલીસ ઘટના સ્થળે દોડી જઈ તપાસનો ધમધમાટ આરંભ કર્યો છે.
આજરોજ સવારના સમયે સંજેલી નગરમાં મેન બજારની વચ્ચો વચ્ચ કોઈ અજાણ્યા ઈસમો દ્વારા કોઈ સ્ત્રીનું પાપ છુપાવવા માટે એક થેલીમાં ભ્રૃણ જેના કટકા કરી થેલીમાં ભરી આ બજારની વચ્ચો વચ્ચ એક મેડીકલની સામે જાહેર રસ્તા પર ફેંકી જઈ નાશી ગયાં હતાં. થેલી માંથી ભ્રૃણના કટકા લોહી લુહાણ હાલતમાં જાહેર રસ્તા પર જોવા મળ્યાં હતાં. એક ક્ષણે જાહેર રસ્તા પરથી પસાર થતાં લોકોમાં આ દ્રશ્યો જોતા અરેરાટી ફેલાઈ જવા પામી હતી. સ્થાનીક લોકોનો અજાણ્યા ઈસમો તથા અજાણી સ્ત્રી પર ફીટકારની લાગણી પણ વરસાવી હતી. ઘટનાને પગલે સ્થળ પર લોકટોળા ઉમટી પડ્યાં હતાં. ઘટનાની જાણ સ્થાનીક પોલીસને કરવામાં આવતાં સ્થાનીક પોલીસનો કાફલો ઘટના સ્થળે દોડી ગયો હતો અને ભ્રૃણના લોહી લુહાણવાળા કટકા કબજે કરી નજીકના દવાખાને રવાના કરવામાં આવ્યાં હતાં. સમગ્ર મામલે સ્થાનીક પોલીસ દ્વારા ગુનો દાખલ કરવાની તજવીજ હાથ ધરી છે.