મોરબીમાં એક ચોંકાવનારો કિસ્સો સામે આવ્યો છે. એક આરોપીએ સગીરા સાથે ઇન્સ્ટાગ્રામ પર મિત્રતા કેળવી તેના ફોટા મેળવ્યા અને પછી તેનું જીવન બરબાદ કરી નાખ્યું.આરોપી અંકિત રાજેશભાઈ ડાભી લખધીરપુર ગામનો રહેવાસી છે. તેણે સગીરા સાથે ઇન્સ્ટાગ્રામ પર મિત્રતા કરી અને તેના ફોટા મેળવ્યા. આ ફોટા વાઇરલ કરવાની ધમકી આપીને તેણે સગીરા સાથે અલગ-અલગ સ્થળે દુષ્કર્મ આચર્યું.
છેલ્લા છ મહિનાથી આરોપી સગીરાનું શોષણ કરતો હતો. સપ્ટેમ્બર 2024માં મોરબીની અવની ચોકડી પાસેથી સગીરાને પોતાની મોટરસાયકલ પર પાનેલી ગામની વાડીમાં લઈ જઈ દુષ્કર્મ આચર્યું. ઓક્ટોબરમાં તેને રાજકોટ લઈ ગયો જ્યાં તેના ભાઈ પ્રદીપે બંનેના ફોટા પાડ્યા.
29 જાન્યુઆરીએ આરોપી સગીરાને હળવદ અને મોરબીના કેસર બાગમાં લઈ ગયો. ત્યાં લીધેલા ફોટા તેણે સગીરાની સગાઈ થયેલા ગામના લોકો સુધી પહોંચાડ્યા. આ કારણે સગીરાની સગાઈ તૂટી ગઈ.સગીરાના પિતાએ મોરબી એ ડિવિઝન પોલીસ સ્ટેશનમાં ફરિયાદ નોંધાવી છે. પોલીસે દુષ્કર્મ, પોક્સો, અપહરણ, આઈટી એક્ટ અને ધમકી આપવા સહિતની કલમો હેઠળ ગુનો નોંધ્યો છે. આરોપીની ધરપકડ માટે પોલીસે કાર્યવાહી શરૂ કરી છે.