વડાપ્રધાન નરેન્દ્ર મોદી ૨૨મી ભારત-રશિયા વાર્ષિક સમિટ માટે રશિયાની બે દિવસીય (૮-૯ જુલાઈ) મુલાકાતે મોસ્કો રવાના થયા છે. રશિયાના રાષ્ટ્રપતિ વ્લાદિમીર પુતિનના આમંત્રણ પર પીએમ મોદી મોસ્કો ગયા છે. વડાપ્રધાનની આ રશિયા મુલાકાતને ખૂબ જ મહત્વપૂર્ણ માનવામાં આવી રહી છે. તેનો અંદાજ એ વાત પરથી પણ લગાવી શકાય છે કે રશિયાના રાષ્ટ્રપતિ વ્લાદિમીર પુતિન તેમની મુલાકાતને લઈને ખૂબ જ ઉત્સાહિત છે.
દ્વિપક્ષીય મંત્રણાના કાર્યક્રમની માહિતી આપતાં રશિયામાં ભારતીય રાજદૂત વિનય કુમારે કહ્યું કે પીએમ મોદી રાષ્ટ્રપતિ પુતિન સાથે ખાનગી મુલાકાત કરશે. આ પછી પ્રતિનિધિમંડળ સ્તરની વાતચીત અને પરસ્પર વાતચીત થશે. આ પછી રાષ્ટ્રપતિ પુતિન વડાપ્રધાન અને તેમના પ્રતિનિધિમંડળ માટે લંચનું આયોજન કરશે. એક પ્રદર્શન કેન્દ્રની મુલાકાત સાથે, દસ્તાવેજોની આપ-લે પણ થશે જેના પર હસ્તાક્ષર કરવાની તૈયારી ચાલી રહી છે.વડાપ્રધાન મોદી વ્લાદિમીર પુતિન વચ્ચે રાત્રિભોજનનું આયોજન કરવામાં આવ્યું છે કોરોનાના કારણે ત્રણ વર્ષ બાદ આ સમિટ થઈ રહી છે.
આ દરમિયાન બંને નેતાઓ વચ્ચે દ્વિપક્ષીય સંબંધોને વધુ ગાઢ બનાવવા પર વાતચીત થશે. બંને નેતાઓ આંતરરાષ્ટ્રીય સ્થિતિ પર પણ ચર્ચા કરશે. જણાવી દઈએ કે વડાપ્રધાન કોરોના પછી પ્રથમ વખત રશિયા જઈ રહ્યા છે. આ પહેલા તેઓ ૨૦૧૯માં રશિયા ગયા હતા. આ મુલાકાત દરમિયાન નેતાઓ વચ્ચે રશિયા-યૂક્રેન સંઘર્ષ પર પણ ચર્ચા થઈ શકે છે. ભારતે ઘણી વખત બંને દેશોને શાંતિની અપીલ કરી છે. ભારતે બંને દેશોને તેમના વિવાદિત મુદ્દાઓને ઉકેલવા માટે વાતચીતનો માર્ગ અપનાવવા પણ વિનંતી કરી છે.
તેમની બે દિવસીય મુલાકાત દરમિયાન પીએમ નરેન્દ્ર મોદી મોસ્કોમાં રહેતા ભારતીય સમુદાયના સમૂહને પણ સંબોધિત કરશે. જેઓ ૯ વર્ષના લાંબા અંતરાલ પછી વડાપ્રધાનની મોસ્કો મુલાકાતને લઈને ઉત્સુક છે અને વડાપ્રધાનના મોસ્કો પહોંચવાની રાહ જોઈ રહ્યા છે. ૮ અને ૯ જુલાઈએ રશિયાની મુલાકાત લીધા બાદ મોદી ૯ જુલાઈએ અહીંથી ઓસ્ટ્રિયા જવા રવાના થશે. તેમનો અહીંનો પ્રવાસ ૧૦ જુલાઈ સુધી ચાલશે.
રશિયા પણ આ પ્રવાસને લઈને ઉત્સાહિત છે. રશિયાના રાષ્ટ્રપતિ પુતિનના પ્રેસ સેક્રેટરીએ હાલમાં જ એક ટીવી ચેનલને આપેલા ઈન્ટરવ્યુમાં કહ્યું હતું કે વડાપ્રધાન મોદીની મુલાકાતનો કાર્યક્રમ મોટો છે. પીએમ મોદીની મુલાકાત અંગે પૂછવામાં આવેલા પ્રશ્ર્નના જવાબમાં તેમણે કહ્યું હતું કે બહુ વ્યસ્ત ન હોય તો દેખીતી રીતે જ એક વ્યાપક એજન્ડા હશે. આ એક સત્તાવાર મુલાકાત હશે અને અમને આશા છે કે બંને નેતાઓ અનૌપચારિક રીતે પણ વાત કરી શકશે.