ઝાલોદ, ઝાલોદ નગરમાં રામસાગર તળાવને કિનારે અતિ પ્રાચીન ભોલેબાબાનું મંદિર આવેલ છે. જે કેટલું જૂનું છે તેની કોઈ ને પણ માહિતી નથી. આ મંદિર તળાવ કિનારે એક નાનકડા મંદિર સ્વરૂપે હતું. સમય વીતતાં નગરના સ્થાનિક લોકો દ્વારા આ મંદિરના નવીનીકરણનો વિચાર આવતા આ મંદિરનું સંપૂર્ણ શાસ્ત્રોક્ત વિધિ સાથે ભવ્ય મંદિર બનાવવામાં આવ્યું. તળાવના કિનારે આવેલ હોવાથી નગરના ધાર્મિક વૃત્તિ ધરાવનાર દર્શનાર્થીઓ માટે આ એક ઉત્તમ સ્થાન બની ગયું. આ મંદિર વિશે માનવામાં આવે છે કે, આ મંદિરમાં સાક્ષાત નાગ દેવતા ભોલેનાથના મંદિરે અવાર નવાર આવે છે તેમજ આ શિવલિંગ સાથે સાક્ષાત નાગ દેવતાને અનેક લોકોએ દર્શન પણ કરેલ છે. આ મંદિરનું નવીનીકરણ થતાં દર્શનાર્થીઓની સંખ્યા આ મંદિરે વધવા લાગી તેમજ તળાવ કિનારે હોવાથી સાંજના સમયે મંદિરના પ્રાંગણમાં અવરજવર વધવા લાગી છે.
આ મંદિરના ભવ્ય નિર્માણ તેમજ નવીન મૂર્તિઓની સ્થાપનાને એક વર્ષ પુરૂં થતાં આ મંદિરના પાટોત્સવ નિમિત્તે ભવ્ય ભજન સંધ્યાનું આયોજન કરવામાં આવ્યું હતું. આ ભજન સંધ્યા નગરના પ્રસિદ્ધ મુવાડાના રામ ભક્ત મિત્ર મંડળ દ્વારા કરવામાં આવી હતી. આ ભજન સંધ્યાનો લ્હાવો નગરજનો એ મોટા પ્રમાણમાં લીધો હતો.