પટણા, ચૂંટણી વ્યૂહરચનાકાર પ્રશાંત કિશોર (પીકે) એ કોંગ્રેસ નેતા અને પાર્ટીના પૂર્વ અધ્યક્ષ રાહુલ ગાંધીને બ્રેક લેવાની સલાહ આપી છે. પીકેએ કહ્યું છે કે જો આ વખતે લોક્સભાની ચૂંટણીમાં સૌથી જૂની પાર્ટી (કોંગ્રેસ)નું પ્રદર્શન નિરાશાજનક છે તો રાહુલ ગાંધીએ એક બાજુ હટી જવું જોઈએ અને બ્રેક લેવો જોઈએ.
પ્રશાંત કિશોરે કહ્યું, ‘રાહુલ ગાંધી છેલ્લા ૧૦ વર્ષથી કોંગ્રેસને અસફળ રીતે ચલાવી રહ્યા છે. આ પછી પણ તેઓ પક્ષમાંથી હટીને પાર્ટીની કમાન બીજાને સોંપવા તૈયાર નથી. જ્યારે તમે છેલ્લા ૧૦ વર્ષથી એક જ કામ કરી રહ્યા છો, જેમાં સફળતા મળી નથી, તો બ્રેક લેવામાં કોઈ નુક્સાન નથી. તમારે બીજા કોઈને ૫ વર્ષ સુધી કરવા દેવા જોઈએ.
પીકેએ કહ્યું, ‘દુનિયાભરના સારા નેતાઓની એક સારી ગુણવત્તા એ છે કે તેઓ ખામીઓને સ્વીકારે છે અને તેને દૂર કરવાનો સક્રિય પ્રયાસ પણ કરે છે. પરંતુ રાહુલ ગાંધીને લાગે છે કે તેઓ બધું જ જાણે છે. સત્ય એ છે કે જો તમને નથી લાગતું કે તમને મદદની જરૂર છે, તો કોઈ તમને મદદ કરી શકશે નહીં. રાહુલને લાગે છે કે તેને કોઈ એવી વ્યક્તિની જરૂર છે જે તેને જે કામ યોગ્ય લાગે તેનો અમલ કરે. પરંતુ આ શક્ય નથી.
૨૦૧૯ની ચૂંટણીમાં પાર્ટીની હાર બાદ કોંગ્રેસ અધ્યક્ષ પદ પરથી રાહુલના રાજીનામાનો ઉલ્લેખ કરતા પીકેએ કહ્યું, ‘રાહુલ ગાંધીએ ત્યારે કહ્યું હતું કે તેઓ પાછા હટી જશે અને બીજા કોઈને ચાર્જ લેવા દેશે. જોકે, વ્યવહારમાં તેણે પોતાની વાતથી વિપરીત કામ કર્યું છે.
રાહુલ ગાંધીથી અસંમતિની જરૂરિયાત પર, પીકેએ કહ્યું, ‘ઘણા નેતાઓ વ્યક્તિગત રીતે સ્વીકારે છે કે તેઓ ‘ટઅડ’ની મંજૂરી વિના પાર્ટીમાં કોઈ નિર્ણય લઈ શક્તા નથી. કોંગ્રેસ અને તેના સમર્થકો કોઈપણ વ્યક્તિથી ઉપર છે. રાહુલ ગાંધીએ આગ્રહ ન રાખવો જોઈએ કે વારંવારની નિષ્ફળતા છતાં તેમણે પાર્ટી માટે એકલા હાથે કામ કરવું પડશે.
પ્રશાંત કિશોરને રાહુલ ગાંધીના દાવા પર સવાલ પૂછવામાં આવ્યો હતો કે કોંગ્રેસના પૂર્વ અધ્યક્ષ ચૂંટણીની નિષ્ફળતા માટે ચૂંટણી પંચ, ન્યાયતંત્ર અને મીડિયા પર દોષારોપણ કરે છે. તેના પર પીકેએ કહ્યું કે આમાં આંશિક રીતે થોડું સત્ય હોઈ શકે છે, પરંતુ તે સંપૂર્ણ ચિત્ર રજૂ કરતું નથી. ૨૦૧૪ની ચૂંટણીમાં સત્તામાં હોવા છતાં કોંગ્રેસ ૨૦૬ બેઠકોથી ઘટીને ૪૪ પર આવી ગઈ. તે સમયે સંસ્થાઓ પર ભાજપનો મર્યાદિત પ્રભાવ હતો.
તમને જણાવી દઈએ કે ચૂંટણી રણનીતિકાર પ્રશાંત કિશોર આઇ પીએસી નામની ચૂંટણી રણનીતિ બનાવતી કંપની ચલાવતા હતા. જોકે, તેનો દાવો છે કે તેણે હવે આ કંપનીથી પોતાને અલગ કરી લીધા છે. આ દિવસોમાં તેઓ બિહારમાં જન સૂરજ યાત્રા કાઢી રહ્યા છે.