પૂર્વ વડાપ્રધાન ડૉ.મનમોહન સિંહનું ગુરુવારે એટલે કે 26 ડિસેમ્બર, 2024ની રાત્રે 92 વર્ષની વયે અવસાન થયું. તેમને રાત્રે 8:06 વાગ્યે દિલ્હીની ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સ (AIIMS) લાવવામાં આવ્યા હતા. તેઓ ઘરે બેહોશ થઈ ગયા હતા. હોસ્પિટલની પ્રેસ રિલિફ અનુસાર, તેમને ઈમરજન્સી વોર્ડમાં દાખલ કરવામાં આવ્યા હતા, જ્યાં તેમણે રાત્રે 9:51 વાગ્યે અંતિમ શ્વાસ લીધા હતા.
કેન્દ્ર સરકારે 7 દિવસનો રાષ્ટ્રીય શોક જાહેર કર્યો છે. તેમજ આવતીકાલના તમામ કાર્યક્રમો રદ કરી દેવામાં આવ્યા છે. ડૉ. મનમોહન સિંહના અંતિમ સંસ્કાર રાજ્ય સન્માન સાથે કરવામાં આવશે.રાહુલ ગાંધી અને પાર્ટી અધ્યક્ષ મલ્લિકાર્જુન ખડગે બેલગાવીથી દિલ્હી જવા રવાના થયા છે. મોડી રાત્રે દિલ્હી પહોંચશે મનમોહન સિંહના નિધન પર રાહુલે લખ્યું- મેં મારા માર્ગદર્શક અને ગુરુને ગુમાવ્યા છે.
મનમોહન સિંહ બે વખત દેશના વડાપ્રધાન હતા. તેઓ લાંબા સમયથી સ્વાસ્થ્ય સંબંધિત સમસ્યાઓથી પીડાતા હતા. આ પહેલા પણ તેમને ઘણી વખત હોસ્પિટલમાં દાખલ કરવામાં આવ્યા હતા.એઈમ્સની બહાર સુરક્ષા વધારી દેવામાં આવી છે. બીજેપી અધ્યક્ષ જેપી નડ્ડા પણ એઈમ્સ પહોંચ્યા છે. મીડિયા રિપોર્ટ્સ અનુસાર, પીએમ મોદી પણ થોડા સમયમાં એઈમ્સ પહોંચી શકે છે.દરમિયાન, કર્ણાટકના બેલગાવીમાં ચાલી રહેલી કોંગ્રેસ વર્કિંગ કમિટી (CWC)ની બેઠક રદ કરવામાં આવી છે.
મનમોહન સિંહના પાર્થિવ દેહને ટૂંક સમયમાં વતન લાવવામાં આવશે
મનમોહન સિંહના પાર્થિવ દેહને થોડીવારમાં તેમના નિવાસસ્થાને લાવવામાં આવશે. AIIMSમાં આ માટેની તૈયારીઓ ચાલી રહી છે. દરમિયાન, ડો. મનમોહન સિંહના નિવાસસ્થાનને જોડતા જનપથ રોડના બંને છેડે વાહનોની અવરજવર બંધ કરી દેવામાં આવી છે.
મનમોહન સિંહ પ્રેસ કોન્ફરન્સ કરનાર છેલ્લા પીએમ હતા
3 જાન્યુઆરી, 2014ના રોજ પીએમ તરીકેની તેમની છેલ્લી પ્રેસ કોન્ફરન્સમાં મનમોહન સિંહે કહ્યું, “હું પ્રામાણિકપણે માનું છું કે ઇતિહાસ મારા માટે સમકાલીન મીડિયા કરતાં વધુ ઉદાર રહેશે.”
પીએમ મોદીએ કહ્યું- તેમણે લોકોનું જીવન સુધારવાના પ્રયાસો કર્યા
પીએમ મોદીએ X પર લખ્યું- ઈન્ડિયા તેમના સૌથી પ્રતિષ્ઠિત નેતા ડો. મનમોહન સિંહના નિધન પર શોક વ્યક્ત કરી રહ્યું છે. સામાન્ય પશ્ચાદભૂમાંથી ઉભરીને તેઓ એક પ્રખ્યાત અર્થશાસ્ત્રી બન્યા. નાણામંત્રી સહિતના હોદ્દા પર કામ કર્યું. વર્ષો સુધી અમારી આર્થિક નીતિ પર ઊંડી છાપ છોડી. સંસદની અંદર તેમનું યોગદાન ઘણું મહત્વનું છે. આપણા વડાપ્રધાન તરીકે તેમણે લોકોના જીવનને સુધારવા માટે વ્યાપક પ્રયાસો કર્યા.
બીજી પોસ્ટમાં લખ્યું છે- જ્યારે ડૉ. મનમોહન સિંહજી વડાપ્રધાન હતા અને હું ગુજરાતનો મુખ્યમંત્રી હતો ત્યારે અમે રોજ વાતો કરતા હતા. અમે શાસન સાથે સંબંધિત વિવિધ મુદ્દાઓ પર ઊંડાણપૂર્વક ચર્ચા કરતા હતા. તેમની બુદ્ધિમત્તા અને નમ્રતા હંમેશા દેખાતી હતી. ઓમ શાંતિ