નવીદિલ્હી, વડાપ્રધાન નરેન્દ્ર મોદી આવતા અઠવાડિયે યુએસ પ્રવાસ પર હશે, જ્યાં તેઓ ઘણાં વિવિધ કાર્યક્રમોમાં ભાગ લેશે. પીએમ મોદીની મુલાકાત પહેલા અમેરિકાના રાષ્ટ્રીય સુરક્ષા સલાહકાર ભારત આવી રહ્યા છે. અમેરિકન NSA જેક સુલિવાન ૧૩ જૂને દિલ્હી પહોંચશે, જ્યાં ભારત સાથે GE-414 એન્જિન ડીલને અંતિમ સ્વરૂપ આપવામાં આવશે. અહીં સુલિવાન તેમના સમકક્ષ એટલે કે ભારતના રાષ્ટ્રીય સુરક્ષા સલાહકાર અજીત ડોભાલને મળશે. પીએમ મોદીની મુલાકાત પહેલા યોજાનારી આ બેઠકને ઘણી મહત્વપૂર્ણ માનવામાં આવી રહી છે.
અમેરિકન એનએસએ જેક સુલિવને ભારત સાથેના સંબંધોને મજબૂત કરવાના અમેરિકાના એજન્ડાને આગળ ધપાવ્યો છે. ભારત પ્રત્યે તેમનું વલણ હંમેશા નરમ રહ્યું છે. તેમની મુલાકાત દરમિયાન એનએસએ અજીત ડોભાલ સિવાય સુલિવાન વડાપ્રધાન નરેન્દ્ર મોદી અને વિદેશ મંત્રી એસ જયશંકરને મળશે. અમેરિકન એનએસએ સાથેની બેઠક દરમિયાન બંને દેશો વચ્ચે સુરક્ષાને લઈને ઘણી મહત્વપૂર્ણ વાતચીત થઈ શકે છે. વડાપ્રધાન નરેન્દ્ર મોદી ૨૦ જૂને અમેરિકા જશે. જ્યાં ૨૨ જૂને તેઓ અમેરિકી રાષ્ટ્રપતિ જો બાયડન સાથે મુલાકાત કરશે. આ બેઠકમાં ઘણા મહત્વપૂર્ણ મુદ્દાઓ પર ચર્ચા થવાની છે, જેમાં રશિયા-યુક્રેન યુદ્ધ ટેક્નોલોજી શેરિંગ પર પણ ચર્ચા કરવામાં આવશે.
અગાઉ જાન્યુઆરી ૨૦૨૩માં જ્યારે ભારતીય રાષ્ટ્રીય સુરક્ષા સલાહકાર અજીત ડોભાલ અમેરિકા ગયા હતા, ત્યારે તેમણે ભારત-અમેરિકા દ્વિપક્ષીય સહયોગ અંગે એક મહત્વપૂર્ણ બેઠક કરી હતી. આ દરમિયાન ડોભાલે તેમના અમેરિકન સમકક્ષ જેક સુલિવાન સાથે ઇનિશિએટિવ ફોર ક્રિટિકલ એન્ડ ઇમેજિંગ ટેક્નોલોજીની પ્રથમ ઉચ્ચ સ્તરીય બેઠકમાં ભાગ લીધો હતો. એનએસએ અજીત ડોભાલ ભારતીય પ્રતિનિધિમંડળ સાથે અમેરિકા પહોંચ્યા હતા. આ બેઠકમાં બંને દેશોએ ક્વોન્ટમ ટેક્નોલોજી, હાઈ પરફોર્મિંગ કમ્પ્યુટિંગ, જેટ એન્જિન ટેક્નોલોજી, યુદ્ધ અને સહયોગ સંબંધિત તમામ ટેક્નોલોજી માટે સંપૂર્ણ બ્લૂ પ્રિન્ટ તૈયાર કરી હતી. જાન્યુઆરી પછી બંને રાષ્ટ્રીય સુરક્ષા સલાહકારો ગયા મહિને એટલે કે મે મહિનામાં પણ મળ્યા હતા. આ દરમિયાન યુએઇના એનએસએ શેખ તહનુન બિન જાયદ અલ નાહયાન પણ હાજર હતા. મીટીંગનો હેતુ એક મેગા પ્રોજેક્ટ અંગે હતો. આ પ્રોજેક્ટમાં સમુદ્ર દ્વારા મય પૂર્વને દક્ષિણ એશિયા સાથે જોડવાની યોજના સામેલ હતી.