આ અરજીમાં ઉઠાવવામાં આવેલા મુદ્દાઓ ખૂબ જ મહત્વપૂર્ણ છે, કારણ કે ક્યારે અને શું જપ્ત કરી શકાય છે, શું ઍક્સેસ કરી શકાય છે, કેવા પ્રકારની સુરક્ષા સુનિશ્ચિત કરવામાં આવે છે તે સંદર્ભમાં કોઈ માર્ગદર્શિકા નથી.
મીડિયાકર્મીઓના ડિજિટલ ઉપકરણોની મનસ્વી રીતે જપ્તી પર ચિંતા વ્યક્ત કરતા સુપ્રીમ કોર્ટે તેને ગંભીર મામલો ગણાવ્યો હતો. સર્વોચ્ચ અદાલતે કેન્દ્ર સરકારને પત્રકારોના હિતોના રક્ષણ માટે યોગ્ય માર્ગદર્શિકા ઘડવા જણાવ્યું હતું. એ પણ કહ્યું કે, એજન્સીની સત્તાનો દુરુપયોગ થવો જોઈએ નહીં.
જસ્ટિસ સંજય કિશન કૌલ અને જસ્ટિસ સુધાંશુ ધુલિયાની બેંચ બે અરજીઓ પર સુનાવણી કરી રહી હતી. આમાંથી એક અરજી ફાઉન્ડેશન ફોર મીડિયા પ્રોફેશનલ્સ દ્વારા દાખલ કરવામાં આવી છે. આ અરજીમાં કેન્દ્ર સરકાર પાસે ડિજિટલ ઉપકરણોને જપ્ત કરવા માટેની માર્ગદર્શિકા જાહેર કરવાની માંગ કરવામાં આવી છે. અરજદાર તરફથી હાજર રહેલા વકીલે કહ્યું કે આ મુદ્દો ખૂબ જ મહત્વપૂર્ણ છે કારણ કે તપાસ એજન્સીઓ ક્યારે અને શા માટે ઇલેક્ટ્રોનિક ઉપકરણોને જપ્ત કરશે તે અંગે કોઈ માર્ગદર્શિકા નથી.
એડિશનલ સોલિસિટર જનરલ એસવી રાજુએ સુનાવણી મુલતવી રાખવાની માંગ કરતા બેંચને કહ્યું કે ઘણા જટિલ કાયદાકીય મુદ્દાઓ છે જેની તપાસ કરવાની જરૂર છે. ટૂંકી સુનાવણી દરમિયાન, અરજદારના વકીલ સિદ્ધાર્થ અગ્રવાલે કહ્યું કે એવા સેંકડો પત્રકારો છે જેમના ડિજિટલ ઉપકરણો સામૂહિક રીતે છીનવી લેવામાં આવ્યા છે.
સુપ્રીમ કોર્ટે કહ્યું કે આ માટે કેટલીક માર્ગદર્શિકા હોવી જોઈએ. આ દેશ એકલી એજન્સીઓ દ્વારા ચલાવી શકાય નહીં. સરકારે એક માર્ગદર્શિકા બહાર પાડવી જોઈએ જે બંને પક્ષોના હિતોનું રક્ષણ કરે. તેના પર એડિશનલ સોલિસિટર જનરલે કહ્યું કે અમે તમામ કાયદાકીય પાસાઓ પર વાત કરીશું. આપને જણાવી દઈએ કે સુપ્રીમ કોર્ટે આગામી સુનાવણી ડિસેમ્બર સુધી ટાળી દીધી છે.