- કોર્ટે કેન્દ્ર અને આઇએમએને નોટિસ જારી કરી અને સુનાવણીની આગામી તારીખ ૧૫ માર્ચ નક્કી કરી
નવીદિલ્હી, સુપ્રીમ કોર્ટે આયુર્વેદિક કંપની પતંજલિ આયુર્વેદના મેનેજિંગ ડાયરેક્ટર આચાર્ય બાલકૃષ્ણ અને યોગ ગુરુ રામદેવને આગામી સુનાવણીની તારીખે હાજર થવા જણાવ્યું છે. વાસ્તવમાં, સુપ્રીમ કોર્ટે પતંજલિ અને બાલકૃષ્ણને તિરસ્કારની નોટિસ મોકલી હતી અને રોગોની સારવાર પર ભ્રામક જાહેરાતો અંગે તેમનો જવાબ માંગ્યો હતો, જેનો તેઓએ જવાબ આપ્યો ન હતો.
જસ્ટિસ હિમા કોહલી અને અહસાનુદ્દીન અમાનુલ્લાહની બેન્ચે કંપની અને બાલકૃષ્ણની કોર્ટ દ્વારા અગાઉ જારી કરાયેલી નોટિસનો જવાબ દાખલ કરવામાં નિષ્ફળતાનો સખત અપવાદ લીધો હતો. બેન્ચે રામદેવને કારણ બતાવો નોટિસ પણ જારી કરી છે કે શા માટે તેમની સામે અવમાનનાની કાર્યવાહી શરૂ ન કરવી જોઈએ.
અગાઉ, સુપ્રીમ કોર્ટે યોગગુરુ રામદેવની પતંજલિ આયુર્વેદ પર તેના ઉત્પાદનો વિશે કોર્ટને આપવામાં આવેલી અગાઉની ખાતરીઓનું ઉલ્લંઘન કરવા અને દવાઓની અસરકારક્તા અંગે ખોટા દાવા કરવા બદલ સખત ઠપકો આપ્યો હતો. જસ્ટિસ હિમા કોહલી અને એ અમાનુલ્લાહની બેન્ચે પતંજલિ આયુર્વેદ અને તેના મેનેજિંગ ડિરેક્ટરને નોટિસ પાઠવીને પૂછ્યું હતું કે શા માટે તેમની સામે અવમાનનાની કાર્યવાહી શરૂ ન કરવી જોઈએ.
ઈન્ડિયન મેડિકલ એસોસિએશન (આઈએમએ)ના વરિષ્ઠ વકીલ પીએસ પટવાલિયાએ અરજીમાં કહ્યું હતું કે પતંજલિએ દાવો કર્યો હતો કે યોગ અસ્થમા અને ડાયાબિટીસનો ’સંપૂર્ણપણે ઈલાજ’ કરી શકે છે. ગયા વર્ષે નવેમ્બરમાં સુપ્રીમ કોર્ટે કેન્દ્રને ભ્રામક જાહેરાતો અંગે સલાહ અને માર્ગદશકા જારી કરવાનો આદેશ આપ્યો હતો. ખંડપીઠે પતંજલિ આયુર્વેદ અને તેના અધિકારીઓને અન્ય દવા પ્રણાલીઓ વિશે મીડિયા (પ્રિન્ટ અને ઇલેક્ટ્રોનિક બંને)માં કંઈપણ ખોટું કહેવા સામે ચેતવણી આપી હતી. કંપનીએ અગાઉ કોર્ટ સમક્ષ પોતાના સોગંદનામામાં આમ ન કરવાનું કહ્યું હતું. ગયા વર્ષે ૨૧ નવેમ્બરના રોજ, કંપનીનું પ્રતિનિધિત્વ કરતા વકીલે સર્વોચ્ચ અદાલતને ખાતરી આપી હતી કે હવેથી કાયદાનું ઉલ્લંઘન થશે નહીં.
કંપની વતી એફિડેવિટમાં એવું કહેવામાં આવ્યું હતું કે પતંજલિ ઉત્પાદનોની ઔષધીય અસરનો દાવો કરતું કોઈ અનૌપચારિક નિવેદન અથવા કોઈપણ ફાર્માસ્યુટિકલ સિસ્ટમ વિરુદ્ધ કોઈપણ નિવેદન અથવા જાહેરાત જારી કરવામાં આવશે નહીં. સર્વોચ્ચ અદાલત ઇન્ડિયન મેડિકલ એસોસિએશ ની અરજી પર સુનાવણી કરી રહી છે જેમાં રામદેવ પર રસીકરણ અભિયાન અને આધુનિક દવાઓને બદનામ કરવાનું અભિયાન ચલાવવાનો આરોપ મૂકવામાં આવ્યો છે.
આઇએમએનો આરોપ છે કે પતંજલિએ કોવિડ-૧૯ રસીકરણ સામે બદનક્ષીભર્યું અભિયાન ચલાવ્યું હતું. તેના પર કોર્ટે ચેતવણી આપી હતી કે પતંજલિ આયુર્વેદ દ્વારા કરવામાં આવતી ખોટી અને ભ્રામક જાહેરાતો તાત્કાલિક બંધ કરવામાં આવે. ચોક્કસ રોગોના ઈલાજના ખોટા દાવા કરતી પ્રત્યેક પ્રોડક્ટ માટે રૂ. ૧ કરોડ સુધીના દંડની શક્યતા ઊભી થઈ હતી. કોવિડ-૧૯ રોગચાળા દરમિયાન એલોપેથિક ફાર્માસ્યુટિકલ્સ પરની તેમની વિવાદાસ્પદ ટિપ્પણીઓ બદલ આઇએમએ દ્વારા દાખલ કરવામાં આવેલા ફોજદારી કેસોનો સામનો કરી રહેલા રામદેવે કેસ રદ કરવા માટે સુપ્રીમ કોર્ટમાં અરજી કરી હતી.
કોર્ટે કેન્દ્ર અને આઇએમએને નોટિસ જારી કરી અને સુનાવણીની આગામી તારીખ ૧૫ માર્ચ નક્કી કરી. રામદેવ પર આઈપીસીની કલમ ૧૮૮, ૨૬૯ અને ૫૦૪ હેઠળ સોશિયલ મીડિયા પર તબીબી સમુદાય દ્વારા ઉપયોગમાં લેવાતી દવાઓ વિશે ભ્રામક માહિતી ફેલાવવા બદલ કેસ નોંધવામાં આવ્યો છે.