પંચમહાલ છોટા ઉદેપુર ના સરહદી ગામ ભીખાપુરા ખાતે રૂંવાડાં ઊભાં કરી દેતી ઘટના સામે આવી છે, જેમાં મહિલાને તેના જ પતિએ ભરબપોરે જાહેરમાં ચપ્પાના ઉપરાછાપરી ઘા ઝીંકી મોતને ઘાટ ઉતારી હતી. મૃતક મહિલા બસ-કંડકટર તરીકે નોકરી કરતી હતી અને તે પાવી જેતપુરથી ભીખાપુરા રૂટની બસમાં ફરજ બજાવતી હતી. એ દરમિયાન સુરત પોલીસમાં ફરજ બજાવતો તેનો પતિ હત્યાની તૈયારી સાથે ભીખાપુર આવી પહોંચ્યો હતો. ત્યારે બસ ભીખાપુર પહોંચતાં જ તે દોટ મૂકી બસમાં ચઢ્યો અને પત્ની કાંઈ વિચારે એ પહેલાં જ તેના પર ચપ્પાના ઘા મારવા લાગ્યો હતો, જેમાં મહિલાને ગળાના ભાગે, પગમાં, પેટમાં તેમજ હાથની નસ કાપી નાખતાં બસમાં જ મહિલાનું કરુણ મોત નીપજ્યું હતું. હત્યાને અંજામ આપ્યા બાદ હત્યારો પતિ ભાગવા જતાં લોકોએ પકડી પાડ્યો હતો. એ બાદ કદવાલ પોલીસને જાણ કરતાં ઘટનાસ્થળે પહોંચી હત્યારાને ઝડપી પાડ્યો હતો તેમજ મૃતદેહને પીએમ અર્થે ખસેડવાની તજવીજ હાથ ધરી હતી.
હત્યારો પહેલાંથી જ બસની રાહમાં હતો પાવી જેતપુરમાં કંડા ગામની મંગીબેન રાઠવા બસ-કંડક્ટર તરીકે નોકરી કરતાં હતાં. તેમનો પતિ અમૃત રાઠવા પોલીસમાં સુરત ખાતે નોકરી કરે છે. એ દરમિયાન મૃતક મંગીબેન પાવી જેતપુરથી ભીખાપુરા જતી બસમાં કંડક્ટર તરીકે ફરજ પર હતાં. ત્યારે બપોરના સમયે બસ ભીખાપુરા ખાતે પહોંચી હતી. એ દરમિયાન ચોકડી પર પહેલાંથી જ હત્યા કરવાના ઇરાદે પહોંચેલા પતિએ બસના પેસેન્જર ઊતરી જતાં ચપ્પા સાથે દોડીને બસમાં ચઢી ગયો હતો. મૃતક મહિલા કાંઈ વિચારે અને બોલે એ પહેલાં જ પોતાની પત્નીને ચપ્પુના ઉપરાછાપરી ગળા, પગ, પેટના ભાગે અને ડાબા હાથની નસ કાપી નાખીને કરપીણ હત્યા કરી હતી. એ બાદ હત્યારો પતિ ત્યાંથી ભાગવા જતાં હાજર લોકોએ તેને ઝડપી પાડીને કદવાલ પોલીસને જાણ કરી હતી.