ગોધરા,
પંચમહાલ જિલ્લા સહિત ગોધરામાં શાંત માહોલમાં ધોરણ 10 અને 12 ની બોર્ડની પરીક્ષાનો પ્રારંભ થયો હતો. વિદ્યાર્થીઓ શાંતિપૂર્ણ વાતાવરણમાં નિર્ભયતાપૂર્વક પરીક્ષા આપી શકે તે માટે જિલ્લા વહીવટી તંત્ર દ્વારા તમામ પરીક્ષા કેન્દ્રો પર સુંદર વ્યવસ્થા કરવામાં આવી હતી. ગોધરાની એમ ઍન્ડ એમ મહેતા સ્કૂલ ખાતે જિલ્લા પંચાયતના પ્રમુખ અને જિલ્લા શિક્ષણઅધિકારી જીગ્નેશ પટેલ તેમજ ભારતીય જનતા પાર્ટીના આગેવાનો દ્વારા પરીક્ષાર્થીઓને આવકારીને મો મીઠું કરાવીને ગુલાબનું ફૂલ આપીને પરીક્ષાની શુભેચ્છાઓ પાઠવવામાં આવી હતી. સમગ્ર રાજ્યમાં આજથી ધોરણ 10 અને 12 બોર્ડ પરીક્ષાનો પ્રારંભ થયો છે. ત્યારે પંચમહાલ જિલ્લામાં પણ શાંતિપૂર્ણ માહોલમાં ધોરણ 10 બોર્ડની પરીક્ષાનો પ્રારંભ થયો હતો. ગોધરા શહેર સહિત જિલ્લામાં આવેલા પરીક્ષા કેન્દ્રો પર વાલીઓ પોતાના બાળકોને મૂકવા ઉમટી પડ્યા હતા. ધોરણ-10 ના પરીક્ષાર્થીઓ સૌપ્રથમવાર બોર્ડની પરીક્ષા આપી રહ્યા છે. ત્યારે વાલીઓ બાળકોને હિંમત આપતા જોવા મળ્યા હતા. ગોધરા શહેરના જાફરાબાદ ખાતે આવેલી અનાજ મહાજન સાર્વજનિક કેળવણી મંડળ સંચાલિત ન્યુ ઇરા હાઇસ્કુલ ખાતે પંચમહાલ જિલ્લા પંચાયત પ્રમુખ તેમજ જિલ્લા શિક્ષણાધિકારી જીજ્ઞેશ પટેલ દ્વારા ધોરણ-10ના પરીક્ષાર્થીઓને પ્રથમ દિવસે ફૂલ આપીને આવકારવામાં આવ્યા હતા અને પરીક્ષાર્થીઓને ભયમુક્ત વાતાવરણમાં પરીક્ષા આપવા માટે હાકલ કરી હતી. તમામ પરીક્ષા કેન્દ્રો પર પરીક્ષાર્થીઓ સરળતાથી પોતાની બેઠક વ્યવસ્થા શોધી શકે તે પ્રકારની વ્યવસ્થા ગોઠવવામાં આવીહતી. પંચમહાલ જિલ્લામાં આવેલા 33 પરીક્ષા કેન્દ્ર ઉપર ધોરણ-10 ના 28,254 પરીક્ષાર્થીઓ ભાષા વિષયની પરીક્ષા આપશે.