ઉત્તરપ્રદેશ, આંબેડકર નગરથી બહુજન સમાજ પાર્ટી (બસપા) ના લોક્સભા સાંસદ રિતેશ પાંડેએ પાર્ટીના પ્રાથમિક સભ્યપદેથી રાજીનામું આપી દીધું હતું. ત્યારબાદ તેઓ ભાજપમાં જોડાઈ ગયા હતા. સંસદના બજેટ સત્ર દરમિયાન સંસદ ભવનની કેન્ટીનમાં લંચ લેનારા ૯ સાંસદોમાં રિતેશ પાંડે પણ સામેલ હતા. એવું કહેવાય છે કે ભાજપ આંબેડકર નગરથી રિતેશ પાંડેને ટિકિટ આપી શકે છે. તેમના પિતા રાકેશ પાંડે સમાજવાદી પાર્ટીના ધારાસભ્ય છે.
બસપામાંથી રાજીનામું આપ્યા બાદ રિતેશ પાંડે આજે જ ભાજપમાં જોડાઈ ગયા હતા. ઉત્તરપ્રદેશના નાયબ મુખ્યમંત્રી બ્રજેશ પાઠક તથા ભાજપના અન્ય નેતાઓની હાજરીમાં તેઓ ભાજપમાં વિધિવત રીતે જોડાઈ ગયા હતા. લોક્સભા ચૂંટણી પહેલાં બસપા માટે આ એક મોટો ઝટકો માનવામાં આવી રહ્યો છે.
બસપા પ્રમુખ માયાવતીને મોકલવામાં આવેલા રાજીનામાના પત્રમાં રિતેશ પાંડેએ લખ્યું, ’જ્યારે હું બસપામાં જોડાયો ત્યારે મને તમારું માર્ગદર્શન મળ્યું અને પાર્ટીના અધિકારીઓ અને કાર્યકરોએ દરેક સંભવ સમર્થન આપ્યું. પાર્ટીએ મને યુપી વિધાનસભા અને લોક્સભામાં પ્રતિનિધિત્વ કરવાની અને સંસદીય દળના નેતા તરીકે કામ કરવાની તક આપી. આ વિશ્વાસ બદલ હું આપનો, પક્ષનો, પક્ષના કાર્યકરો અને સમર્થકોનો મારા હૃદયથી આભાર વ્યક્ત કરું છું.
તેમણે પત્રમાં આગળ લખ્યું, ’લાંબા સમયથી મને પાર્ટીની મીટિંગમાં આમંત્રણ આપવામાં આવ્યું ન હતું અને ન તો નેતૃત્વના સ્તરે વાતચીત કરવામાં આવી હતી. માયાવતીને સંબોધતા તેમણે લખ્યું કે મેં તમારો અને ઉચ્ચ અધિકારીઓનો સંપર્ક કરવા અને મુલાકાતના અસંખ્ય પ્રયાસો કર્યા પરંતુ કોઈ ઉકેલ મળ્યો નહીં. આ સમયગાળા દરમિયાન હું મારા વિસ્તારના લોકો અને પાર્ટી કાર્યર્ક્તાઓને સતત મળતો રહ્યો. હું એ નિષ્કર્ષ પર પહોંચ્યો છું કે પાર્ટીને હવે મારી સેવા અને હાજરીની જરૂર નથી અને તેથી મારી પાસે પાર્ટીમાંથી રાજીનામું આપવા સિવાય કોઈ વિકલ્પ નથી. પાર્ટી સાથે સંબંધો તોડવાનો નિર્ણય ભાવનાત્મક રીતે મુશ્કેલ નિર્ણય છે.