- રાયફલ ડ્રીલ, ડોગ શો, મોટરસાયકલ શો બનશે આકર્ષણનું કેન્દ્ર.
- શહેરના એસ.આર.પી ગ્રાઉન્ડ ખાતે પોલીસ જવાનો દ્વારા થઈ રહી છે: ધ્વજવંદન પરેડની તડામાર તૈયારીઓ.
ખેડા જીલ્લાના નડિયાદમાં 78મા સ્વાતંત્ર્ય પર્વની રાજ્ય કક્ષાની ઉજવણી કરવામાં આવનાર છે.આ ઉજવણીની તડામાર તૈયારીઓ જીલ્લા વહીવટી તંત્ર દ્વારા કરવામાં આવી રહી છે.
સ્વાતંત્ર્ય દિને શહેરના એસ.આર.પી ગ્રાઉન્ડ ખાતે ધ્વજવંદન કાર્યક્રમ યોજાનાર છે.સાથે સાથે પોલીસના જવાનો દ્વારા પણ ધ્વજવંદન પરેડની તૈયારીઓ શરૂ કરવામાં આવી છે.એસ.આર.પી મેદાન ખાતે સવારે અને સાંજના સમયે પોલીસ જવાનો દ્વારા પરેડનું રિહર્સલ કરવામાં આવી રહ્યું છે.
પરેડના નોડલ અધિકારી અને નાયબ જીલ્લા પોલીસ અધિક્ષક વિજયસિંહ પરમારે જણાવ્યું કે, ધ્વજવંદન ની મુખ્ય પરેડમાં આ વખતે ચેતક કમાન્ડો,મરીન કમાન્ડો સહિત રાજ્યના વિવિધ જીલ્લાઓમાંથી પુરૂષ અને મહિલાઓની 19 જેટલી પ્લાટુન ભાગ લઈ રહી છે.જેમાં એસ.ડી.આર.એફ, જી.આર.ડી, એન.સી.સી.નો સમાવેશ થાય છે.આ ઉપરાંત મહારાષ્ટ્ર પોલીસની પણ એક પ્લાટુન પરેડમાં ભાગ લેવાની છે.એક પ્લાટુંનમાં 30 જવાનોનો સમાવેશ થાય છે.આ તમામ જવાનોને પોલીસના ખાસ ટ્રેનેરો દ્વારા પરેડની તૈયારીઓ કરાવવામાં આવી રહી છે.
પરમારે ઉમેર્યું કે, 15 ઓગસ્ટના રોજ પોલીસ દ્વારા રાષ્ટ્ર ધૂન સાથે તિરંગાને સલામી આપવામાં આવશે.આ ઉપરાંત પોલીસ દ્વારા અતુલ્ય ભારત હેઠળ નારીશક્તિની થીમ સાથે દેશભક્તિના ગીતોનો સાંસ્કૃતિક કાર્યક્રમ યોજાશે.જીલ્લા પ્રસાશન દ્વારા એક ભારત શ્રેષ્ઠ ભારત થીમ સાથે જીલ્લા કલેકટર અમિત પ્રકાશ યાદવના માર્ગદર્શન હેઠળ શાળા કોલેજના વિદ્યાર્થીઓ દ્વારા સાંસ્કૃતિક કાર્યક્રમ પણ યોજાનાર છે.
પરેડના દિવસે મરીન કમાન્ડો દરિયાઈ સુરક્ષા અંગેનું નિદર્શન કરશે.ગુજરાત પોલીસના શ્ર્વાનદળ દ્વારા ઓબીડીયન્સ અને ઓબસ્ટ્રીકલ્સ અંગે ડેમો યોજાશે.જેમાં વિસ્ફોટકો શોધવા, જમ્પિંગ, નશીલા પદાર્થ શોધવા, સેલ્યુટિંગ સહિતના કરતબો કરવામાં આવશે.