જામનગર, ભારતીય ક્રિકેટમાં હાલમાં એક નામ ચર્ચામાં છે. આ નામ છે હાર્દિક પંડ્યા. પંડ્યા સમાચારમાં એટલા માટે છે કારણ કે તે હાલમાં જ ઘરે પરત ફર્યો છે. એટલે કે તે આઇપીએલમાં પોતાની જૂની ટીમ માટે રમતો જોવા મળશે.આઇપીએલ ૨૦૨૪ પહેલા મુંબઈ ઈન્ડિયન્સે પંડ્યાને ગુજરાત ટાઈટન્સ સાથે ટ્રેડ કર્યો છે. મુંબઈએ પણ આગામી સિઝન માટે પંડ્યાને પોતાના કેપ્ટન તરીકે નિયુક્ત કર્યા છે. દરમિયાન પંડ્યાનો એક વીડિયો સામે આવ્યો છે જેમાં ગુજરાતમાં તેમનું ઉષ્માભર્યું સ્વાગત કરવામાં આવી રહ્યું છે.
પંડ્યા ૨૦૧૫થી આઇપીએલ રમી રહ્યો છે. ત્યારબાદ તે મુંબઈ ઈન્ડિયન્સ માટે રમ્યો અને ૨૦૨૧ સુધી ત્યાં રહ્યો. પરંતુ મુંબઈએ તેને વર્ષ ૨૦૨૨માં જાળવી રાખ્યો ન હતો. ત્યારપછી નવી ટીમ ગુજરાતે પંડ્યાનો ઉમેરો કરીને તેને કેપ્ટન બનાવ્યો. પંડ્યાએ પહેલી જ સિઝનમાં ગુજરાત માટે ખિતાબ જીત્યો હતો અને પછી આઇપીએલ ૨૦૨૩માં પણ તે ટીમને ફાઈનલમાં લઈ ગયો હતો પરંતુ તે ટાઈટલ જીતી શક્યો નહોતો. ચેન્નાઈ સુપર કિંગ્સે ગુજરાત ટાઈટન્સને હરાવ્યું હતું.
હાલમાં પંડ્યાનો એક વીડિયો વાયરલ થઈ રહ્યો છે જેમાં તે જામનગર પહોંચી ગયો છે. તે જામનગરમાં એક મોટી બિલ્ડિંગની બહાર છે જે ઓફિસ કે સોસાયટીના મુખ્ય દરવાજા જેવું લાગે છે. આ પછી, પંડ્યાના સ્વાગત માટે બંને બાજુ ઘોડાઓ દેખાય છે અને તેમના આગમન પર જોરદાર અવાજ કરવામાં આવે છે. પંડ્યાની કાર અટકી જાય છે અને પછી ઘોડા પર બેઠેલા વ્યક્તિ દ્વારા પૂછવામાં આવતાં તેની કાર અંદર જાય છે. ઘોડાઓ તેની ગાડીની આગળ અને પાછળ ચાલે છે. ૩૦ સેકન્ડનો આ વીડિયો હાલમાં સોશિયલ મીડિયા પર વાયરલ થઈ રહ્યો છે જેમાં પંડ્યાનું મહારાજાની જેમ સ્વાગત કરવામાં આવી રહ્યું છે.
પંડ્યા વનડે વર્લ્ડ કપ ૨૦૨૩માં ભારતીય ટીમનો ભાગ હતો. પરંતુ ટીમની ચોથી મેચમાં તે ઈજાગ્રસ્ત થયો હતો. તેને પગની ઘૂંટીમાં ઈજા થઈ હતી. આ પછી તે વર્લ્ડ કપમાંથી બહાર થઈ ગયો હતો. હાલમાં તે પોતાની ઈજા પર જ કામ કરી રહ્યો છે. થોડા દિવસો પહેલા એવા અહેવાલો હતા કે પંડ્યા ઈજાના કારણે આઇપીએલ ૨૦૨૪માંથી બહાર થઈ શકે છે. પરંતુ બાદમાં સ્પષ્ટતા થઈ હતી કે પંડ્યા સ્વસ્થ થઈ ગયો છે અને જાન્યુઆરીમાં અફઘાનિસ્તાન સામે રમાનારી ત્રણ મેચની ટી ૨૦ શ્રેણીમાં ભારતીય ટીમનું સુકાન સંભાળશે.