લખનૌ,યુપીના પૂર્વ સીએમ અને સમાજવાદી પાર્ટીના વડા અખિલેશ યાદવની મુશ્કેલીઓ વધી ગઈ છે. ભાજપે તેમની સામે ચૂંટણી પંચમાં ફરિયાદ કરી છે. ભાજપે ચૂંટણી પંચને મુખ્તાર અંસારીના મૃત્યુ અંગેના તેમના નિવેદનો અને વિદેશમાં કેટલાક લોકોની હત્યામાં ભારતની સંડોવણીના પાયાવિહોણા દાવાઓ પર અખિલેશ યાદવ સામે તાત્કાલિક પગલાં લેવા વિનંતી કરી હતી.
ભાજપના રાષ્ટ્રીય મહાસચિવ અરુણ સિંહ, સંજય મયુર અને ઓમ પાઠક સહિતના પક્ષના નેતાઓના એક પ્રતિનિધિમંડળે યાદવ વિરુદ્ધ ચૂંટણી પંચમાં ફરિયાદ કરી હતી, જેમાં તેમના પર આદર્શ આચાર સંહિતાનું ઉલ્લંઘન કરવાનો આરોપ લગાવ્યો હતો.
ચૂંટણી પંચના અધિકારીઓને મળ્યા બાદ પત્રકારો સાથે વાત કરતા સિંહે કહ્યું કે યાદવ દાવો કરી રહ્યા છે કે અન્સારીનું જેલમાં ઝેર પીવાથી મોત થયું હતું. તેમણે કહ્યું, ‘તેઓ કોઈપણ પુરાવા વિના આવા નિવેદનો આપી રહ્યા છે કારણ કે લોક્સભા ચૂંટણીમાં તેમની પાર્ટીની હારનો અહેસાસ કર્યા પછી તેઓ માનસિક સંતુલન ગુમાવી ચૂક્યા છે.’
બીજેપી નેતાએ અન્ય દેશોમાં કેટલાક લોકોની હત્યામાં ભારતની સંડોવણી વિશે પાયાવિહોણા આરોપો કરીને દેશનું અપમાન કરવા માટે યાદવની ટીકા પણ કરી હતી.